ԵՎՐՈՊԱՅԻ 2 ՉԵՄՊԻՈՆ ՌՈՒՍԱՍՏԱՆԻ ԿԱԶՄՈՒՄ Մինսկում ավարտված բռնցքամարտի Եվրոպայի առաջնությունում Հայաստանը ներկայացրած 7 բռնցքամարտիկներից միայն Արամ Ավագյանին (56 կգ) հաջողվեց մրցանակակիր դառնալՙ նվաճելով բրոնզե մեդալ: Գերազանց ելույթ ունեցան ռուսաստանցի բռնցքամարտիկները, որոնք նվաճեցին 5 ոսկե, 1 արծաթե եւ 3 բրոնզե մեդալ: Մինչեւ 49 կգ քաշային կարգում 2-րդ անգամ Եվրոպայի չեմպիոն հռչակվեց Դավիթ Հայրապետյանը, որը եզրափակիչում պարտության մատնեց իռլանդացի Պատրիկ Բառնեսին: Ոսկե մեդալի արժանացավ նաեւ Եվրոպայի առաջնություններում նորամուտը նշած Արմեն Զաքարյանը: Մինչեւ 64 կգ քաշային կարգում Արմենը հաղթեց մոլդովացի Դմիտրի Գալագոտին: ՌԴ հավաքականի կազմում բրոնզե մեդալի էր արժանացել Հովիկ Հովհաննիսյանը (52 կգ): Բացի ռուսաստանցի 2 բռնցքամարտիկներից, եզրափակիչ էին դուրս եկել եւս 2 հայ մարզիկներ: Մինչեւ 60 կգ քաշային կարգում Բելառուսը ներկայացնող Վազգեն Սաֆարյանցը պարտվեց ուկրաինացի Պավլո Իշչենկոյին: Անհաջողության մատնվեց նաեւ մինչեւ 69 կգ քաշային կարգում հանդես եկած Արայիկ Մարությանը, որը ներկայացնում էր Գերմանիան: Նա պարտվեց ռուսաստանցի Ալեքսանդր Բեսպուտինին: | 
