«ԷՆ ՈՒՐԻՇ ՖՐՈՒՆԶԻԿԸ». ՖԻԼՄ ԱՐՏԻՍՏԻ ՄԱՍԻՆ Գ. Մ. Մհեր (Ֆրունզիկ) Մկրտչյան արտիստի մասին իրենց նոր նկարահանած կինոնկարի հեղինակներ Հովհաննես Պապիկյանն ու Շուշանիկ Սահակյանը հուլիսի 10-ին` նրա ծննդյան 83-ամյակի օրերին, առաջինը ներկայացրին մեծ արվեստագետի ծննդավայր Գյումրիում` «Հոկտեմբեր» կինոթատրոնում: «Էն ուրիշ Ֆրունզիկը» 53 րոպե տեւողությամբ վավերագրական ժապավենը ստեղծագործական խմբի երեք տարվա աշխատանքի արդյունքն է եւ հայ բեմի ու կինոյի տաղանդավոր վարպետին ներկայացնում է յուրովի: Ի տարբերություն Մհեր Մկրտչյանի մասին պատմող շատ այլ գործերի, այստեղ չկան տարբեր մարդկանց կարծիքներ, տխուր ու դժբախտ մարդու նրա հայտնի կերպարի վերարծարծումներ: Այստեղ արտիստը հիմնականում ինքն է խոսում, որով մեզ ներկայանում է, հեղինակների իսկ բնորոշմամբ, փիլիսոփա, մտածող Մհեր Մկրտչյանը, որն ամբողջ կյանքում չբացվեց, ոչ մի տեղ չփորձեց երեւալ, բացի դերերից: Ֆիլմում օգտագործվել են արտիստի ձայնագրությունները, որտեղ նա խոսում է արվեստի, կինոյի ու թատրոնի մասին, ներկայացված են հատվածներ թատրոնում ու «Հայֆիլմի», «Մոսֆիլմի», «Վրացֆիլմի» կինոժապավեններում նրա խաղացած դերերից: Գյումրեցի հանդիսատեսը 53 րոպե կրկին համաքաղաքացի մեծ արվեստագետի հետ էր եւ ջերմորեն ընդունեց կինոնկարը: Իսկ որ «Հոկտեմբեր» կինոթատրոնի դահլիճն այս առիթով սպասվածի չափ մարդաշատ չէր, մեղավորը, թվում է, ոչ հանդիսատեսն էր, ոչ, առավել եւս, ֆիլմի հեղինակները, այլ` մարդկանց վատ իրազեկումը: Սա առաջին անգամը չէ, երբ քաղաքում կազմակերպվող մի արժեքավոր մշակութային միջոցառման մասին մարդիկ իմանում են դրա տեղի ունենալուց հետո: |
