ԳՈՐԳԵՐԻ ԹԱՆԳԱՐԱՆԻ ՇՆՈՐՀԱՆԴԵՍ ՇՈՒՇԻՈՒՄ ԳԱՐԻԿ ԱՎԵՏԻՍՅԱՆ Երեկ Շուշիի արվեստի կենտրոնում կայացել է Գորգերի թանգարանի շնորհանդեսը, հաղորդում է panorama.am կայքը: Թանգարանը ստեղծվել է մասնավոր նախաձեռնությամբ` Վարդան Ասծատրյանի կողմից, ով ներկայումս զբաղեցնում է ԼՂՀ նախագահի խորհրդականի պաշտոնը: Այս մասին հաղորդում են ԼՂՀ մշակույթի եւ երիտասարդության հարցերի նախարարությունից: Թանգարանի հավաքածուն ներառում է 17-րդ դարի վերջից մինչեւ 20-րդ դարի սկիզբն ընկած ժամանակահատվածում հյուսված 250-ից ավելի գորգեր, որոնք լավագույնս ներկայացնում են արցախյան գորգարվեստի առանձնահատկությունները: Թանգարանի ստեղծման նպատակն է մոռացությունից ու կորստից փրկել արցախյան ավանդական գորգերն ու գործվածքները, մշտական ցուցադրության միջոցով ներկայացնել արցախյան գորգագործական մշակույթը` այդ կերպ նաեւ հակազդելով Ադրբեջանի կողմից հետեւողականորեն իրականացվող հայկական մշակույթի յուրացման քաղաքականությանը: Շուշիի արվեստի կենտրոնը հիմնադրվել է 2012թ. մոսկվայաբնակ բարերար Կարո Սարգսյանի կողմից: 2013թ. օգոստոսին շենքի առաջին հարկը անհատույց հատկացվել է արցախյան գորգերի եւ կենցաղային հին իրերի պահպանման ու ցուցադրման համար: Արցախի մշակութային ժառանգության պահպանմանն ու պաշտպանությանն ուղղված այս նախաձեռնությունը կարեւորելովՙ ԼՂՀ մշակույթի եւ երիտասարդության հարցերի նախարարությունը պատրաստակամություն է հայտնել աջակցելու Գորգերի թանգարանի գործունեությանը: Պետություն-մասնավոր փոխգործակցությամբ, այսպիսով, Շուշիում ստեղծվում է մշակութային եւս մեկ հաստատություն, որի գործունեությունը կարող է նախադրյալներ ստեղծելՙ Արցախը վերստին գորգագործության ուսումնասիրության ու զարգացման կենտրոն դարձնելու համար: | 
