«ՄԻԿԱՆ» 2-ՐԴ ՀԱՂԹԱՆԱԿԸ ՏՈՆԵՑ Շախմատի եվրոպական գավաթների խաղարկության 3-րդ տուրում «Միկան» 2,5-1,5 հաշվով պարտության մատնեց «Ջելիկա ՊԵՊ-ին»: Մեր թիմի հաղթանակն ապահովեց Էլինա Դանիելյանը, որը նախորդ տուրում Մոնտե Կառլոյի թիմի հետ մրցախաղում «Միկայի» շախմատիստուհիներից միակ պարտությունն էր կրել: Էլինայի մրցակցուհին Մարիա Ռակիչն էր: Մյուս պարտիաներն ավարտվեցին ոչ-ոքի: Հաշտություն կնքեցին Հարիկա Դրոնավալին ու Նատալիա Ժուկովան, Լիլիթ Մկրտչյանն ու Ջովանա Վոյնովիչը, Լելա Ջավախիշվիլին եւ Ջովանա Էրիչը: 3 տուրից հետո «Միկան» 4 միավորով 3-րդ տեղում է: 6 միավորով առաջատարը Մոնտե Կառլոյի թիմն է, որը 4-0 հաշվով ջախջախեց իր հետ աղյուսակը գլխավորող Ռուսաստանի «Յուգրային»: Վերջինս եւս վաստակել է 4 միավոր եւ հաջորդ տուրում մրցելու է «Միկայի» հետ: Տղամարդկանց մրցաշարում Սանկտ Պետերբուրգի թիմը 5-1 հաշվով հաղթեց «Պերիստերիին»: Սերգեյ Մովսիսյանը 4-րդ խաղատախտակի վրա ոչ-ոքի ավարտեց պարտիան Անդրեաս Ցերմիադիանոսի հետ: Սանկտ Պետերբուրգի թիմը 6 միավորով «Մալախիտի», ՍՈԿԱՐ-ի, «Յուգրայի» եւ «G-Team-ի» հետ առաջատարների ցանկում է: Բոլոր պարտիաներում վաստակած միավորներով (16,5) Մովսիսյանի թիմը 3-րդ տեղում է, իսկ աղյուսակը 18 միավորով գլխավորում է «Մալախիտը»: | 
