ԷԿՈ-ԿՐԹԱԿԱՆ ԿԵՆՏՐՈՆ ՈՒՐԾԱՁՈՐՈՒՄ Արարատի մարզի Ուրծաձոր համայնքում պաշտոնապես բացվել է էկո-կրթական նորակառույց կենտրոնը: Այն կառուցվել է Վայրի բնության եւ մշակութային արժեքների պահպանման հիմնադրամի կողմից` ՄԱԶԾ-Գլոբալ էկոլոգիական հիմնադրամի փոքր դրամաշնորհների ծրագրի ֆինանսական աջակցությամբ: Կենտրոնի նպատակը համայնքի բնակիչների շրջանում կենսառեսուրսների կայուն օգտագործման կարողությունները խրախուսելն ու եկամուտ ապահովելն է` առանց շրջակա միջավայրի վրա բացասական ազդեցության: Էկո-կրթական կենտրոնը գտնվում է «Կովկասյան կենսաբամազանության ապաստարանում», որը բուֆերային գոտի է հանդիսանում «Խոսրովի անտառ» պետական արգելոցի համար: Լինելով հարավկովկասյան տարածաշրջանի առաջին պահպանվող տարածքը, «Կովկասյան կենսաբամազանության ապաստարանը» կառավարվում է մասնավոր (ոչ պետական) կազմակերպության` ՎԲՄԱՊՀ-ի կողմից: Նախագիծն իրականացվում է բրիտանական Համաշխարհային հողայի միավորում (World Land Trust) կազմակերպության, ԲՊՄՄ-ի Նիդեռլանդների ազգային կոմիտեի (IUCN NL) եւ ՎիվաՍել-ՄՏՍ ընկերության աջակցությամբ: Բնապահպանական ուսուցման կենտրոն լինելուց բացի, Ուրծաձորի նորակառույց կենտրոնը «կանաչ» շինության մոդել է: Դրա կառուցման համար կիրառվել են շրջակա միջավայրի համար անվնաս տեխնոլոգիաներ: Մասնավորապես`կենտրոնի տաք ջրի մատակարարումն իրականացվում է արեւային մարտկոցների միջոցով, քամու, արեւային էներգիայի, մասամբ էլ հիդրոկայանի շնորհիվ` կատարվում է էլեկտրաէներգիայի խնայողություն: Շրջակա միջավայրը կոյուղաջրերից պաշտպանելու համար շինությունը համալրվել է կեղտաջրերի զտման սարքով: Կարեւոր համարելով բնապահպանական ծրագրերի իրականացումը, ՎիվաՍել-ՄՏՍ-ն աջակցում է Վայրի բնության եւ մշակութային արժեքների պահպանման հիմնադրամի գործունեությանը: Կենտրոնի բացմանը հաջորդել է խորհրդանշական ծառատունկը: Ուրծաձորի էկո-կրթական կենտրոնը համայնքի եւ հարակից բնակավայրերի բնակիչներին, դպրոցականներին եւ ուսանողներին հնարավորություն կտա մասնակցելու դասընթացների եւ սեմինարների: Ավելին, այն կդառնա նաեւ գիտական հետազոտություների կազմակերպման եւ եւ էկո-տուրիզմի զարգացման վայր` նպաստելով համայնքի զարգացմանը: | 
