ՍԱՐԳԻՍ ԳՐԻԳՈՐՅԱՆ. «ՀԱՅԱՍՏԱՆՈՒՄ ՀԱՆԴԲՈԼԻ ԶԱՐԳԱՑՄԱՆ ՀԱՄԱՐ ՄԵԾ ՆԵՐԴՐՈՒՄՆԵՐ ԵՆ ԱՆՀՐԱԺԵՇՏ» Մեկնարկում է «ՀՀ վարչապետի գավաթի» 4-րդ մրցաշարը Այսօր մայրաքաղաքի «Դինամո» մարզադահլիճում կտրվի «ՀՀ վարչապետի գավաթի» հանդբոլի միջազգային 4-րդ մրցաշարի մեկնարկը: Հայաստանի հավաքականը կհյուրընկալի Ռուսաստանի ընտրանուն: Հանդիպումը կսկսվի ժամը 16-ին: Իսկ մինչ այդ մրցասպարեզ դուրս կգան Ուկրաինայի եւ Վրաստանի հանդբոլիստները: Երեկ «Ուրբաթ» ակումբում կայացած մամուլի ասուլիսի ժամանակ հանդբոլի Հայաստանի ֆեդերացիայի նախագահ Սարգիս Գրիգորյանը տեղեկացրեց, որ այս անգամ մրցաշարին մասնակցելու են մինչեւ 18 տարեկան հանդբոլիստները: Նպատակն այն է, որ մրցակից թիմերն ինչպես հարկն է ստուգեն իրենց պատրաստվածության մակարդակը հաջորդ տարվա հունվարին կայանալիք Եվրոպայի երիտասարդական առաջնության ընտրական մրցաշարից առաջ: Այդ մրցաշարում հայ հանդբոլիստները Ռումինիայում մրցելու են տանտերերի եւ թուրքերի հետ: Հանդբոլի Հայաստանի երիտասարդական հավաքականը «Վարչապետի գավաթի խաղարկությանը» նախապատրաստվելիս Թբիլիսիում մրցաշարի է մասնակցել: Եթե նախորդ խաղարկություններում մեր մեծահասակների հավաքականում ընդգրկված էին Ֆրանսիայում, Ռուսաստանում եւ Գերմանիայում հանդես եկող հայ հանդբոլիստներ, ապա այս անգամ ստիպված ենք ապավինել սեփական կադրերին: 2015-ին կայանալիք Համահայկական խաղերի հանդբոլի մրցաշարին նախապատրաստվելու նպատակով մտադրություն կա «Վարչապետի գավաթի» հաջորդ խաղարկության մասնակից թիմերի ղեկավարներին խնդրել, որպեսզի հնարավորության դեպքում իրենց կազմերում հայազգի մարզիկների ընդգրկեն: Սարգիս Գրիգորյանը նշեց, որ թեեւ հանդբոլը մեր հանրապետությունում մասսայականություն է վայելում, սակայն սիրողական մակարդակի վրա է: Պրոֆեսիոնալ ակումբների ստեղծման համար ֆինանսական զգալի միջոցներ են անհրաժեշտ: Հանդբոլի Հայաստանի ֆեդերացիան պետբյուջեից տարեկան 18 մլն դրամ է ստանում, ինչը բավարար չէ ՀՀ առաջնությունների անցկացման եւ միջազգային մրցաշարերի մասնակցության համար: Թեեւ այս ամենին, մարզաձեւը մեծ տարածում ունի Ալավերդիում, Վանաձորում, Ստեփանակերտում, Քաջարանում, Գորիսում եւ, իհարկե, Երեւանում: Նույնիսկ Լոռու մարզի առաջնություն է անցկացվում, որն իր մակարդակով չի զիջում ՀՀ առաջնություններին: Արցախում եւս հանդբոլը սիրված մարզաձեւ է եւ արդեն 7 տարի է, ինչ արցախյան թիմերը մասնակցում են ՀՀ առաջնություններին: Հիմնախնդիրներից մեկը հանրապետությունում հանդբոլի համար նախատեսված միջազգային չափանիշներին համապատասխանող մարզադահլիճների բացակայությունն է: Այդ պատճառով Հայաստանի ֆեդերացիան հնարավորություն չունի միջազգային խոշոր մրցաշարերը Երեւանում կազմակերպելու հայտ ներկայացնելու: Նման մեկ մարզադահլիճի կառուցման համար մոտ 2 մլն դոլար է անհրաժեշտ: Սարգիս Գրիգորյանը կոչ արեց խաղային մյուս մարզաձեւերի ֆեդերացիաների ղեկավարներին պետբյուջեից հատկացվելիք գումարի կեսն ուղղել միջազգային չափանիշներին համապատասխանող մարզադահլիճի շինարարությանը: Մեկ այլ հիմնախնդիր է որակյալ մարզիչների սակավաթվությունը: Ճիշտ է, մարզաձեւի ֆեդերացիան եվրոպական ֆեդերացիայի հետ համատեղ վերապատրաստման դասընթացներ է կազմակերպում մեր մարզիչների համար, սակայն դժվարություններ են ծագում օտար լեզվի չիմացության պատճառով: Հայաստանի ֆեդերացիան իր միջոցներով պատրաստ է օտար լեզվի դասընթացներ կազմակերպել մարզիչների համար, սակայն վերջիններս առանձնապես ցանկություն չունեն սովորելու: Այս փաստը զարմացնում եւ մտահոգում է Սարգիս Գրիգորյանին: Եվ այսպես, 3 օր շարունակ «Դինամո» մարզադահլիճում մարզասերները հնարավորություն կունենան հետեւելու հանդբոլիստների մրցավեճին: Վաղը մեր հավաքականը կմրցի վրացիների հետ, իսկ նոյեմբերի 30-ին մրցակիցը կլինի Ուկրաինայի հավաքականը: Այդ խաղով էլ կավարտվի մրցաշարը, որին ներկա կգտնվի ՀՀ վարչապետ Տիգրան Սարգսյանը: Հենց նա էլ կկատարի պարգեւատրման արարողությունը: | 
