ՖՈՒՏԲՈԼԻ ԱԿԱԴԵՄԻԱ ՆԱԵՎ ԳՅՈՒՄՐԻՈՒՄ Ա. Մ. Կառավարության այսօրվա նիստում հավանության կարժանան Գյումրու ֆուտբոլի ակադեմիայի ստեղծման ներդրումային ծրագիրը: Այս առնչությամբ Գյումրու քաղաքապետը գրությամբ դիմել է Հայաստանի վարչապետին եւ խնդրել կառավարության համաձայնությունը` Հայաստանի ֆուտբոլի ֆեդերացիային անհատույց (մշտական) օգտագործման տրամադրված Գյումրի քաղաքի «Մուշ-2» թաղամաս N10/5 հասցեի հողամասը ֆուտբոլի ֆեդերացիային նվիրաբերելուն: Գյումրու քաղաքապետի որոշմամբ Հայաստանի ֆուտբոլի ֆեդերացիային անհատույց (մշտական) օգտագործման է տրամադրվել Գյումրի քաղաքի «Մուշ-2» թաղամասում գտնվող եւ համայնքային սեփականություն հանդիսացող 8 հա մակերեսով հողամասըՙ ֆուտբոլի մարզահամալիր կառուցելու նպատակով: Նշված հողատարածքի վրա Հայաստանի ֆուտբոլի ֆեդերացիան արդեն կատարել է 1,2 մլրդ դրամի ներդրում, կառուցելով ֆուտբոլի մարզահամալիր բաղկացած 1299 քմ մակերեսով ակադեմիայից, 240 քմ մակերեսով պարսպից եւ 8 ֆուտբոլի դաշտերից, որոնցից 6-ը բնական, իսկ 2-ըՙ արհեստական խոտածածկով: | 
