CNN-Ը ՍԻՐԻԱՅՈՒՄ ՌԴ ՆԵՐԿԱՅՈՒԹՅԱՆ ԱՃԻ ՄԱՍԻՆ Պ. Ք. Ամերիկյան CNN հեռուստաալիքի տվյալներով, Ռուսաստանը կտրուկ ավելացրել է ռազմական տեխնիկայի քանակը Սիրիայում, ինչպես նաեւ անօդաչու սարքերի թռիչքներ է սկսել այդ երկրի օդային տարածքում: Մոսկվան իր հերթին հաղորդել է Դամասկոսում ՌԴ դեսպանատան գնդակոծման մասին: CNN-ը դրանից եզրակացնում է, որ Ասադին օգնելու պատճառով Ռուսաստանը հայտնվել է կրակագծի վրա: Ամերիկացի երկու պաշտոնյաների խոսքերով, Սիրիայի տարածքի վրա ռուսական անօդաչու սարքերի հայտնվելը վկայում է դիտորդական գործողությունների իրականացման մասին: Ամերիկացի պաշտոնյաները պնդում են, թե ռուսները Լաթաքիայի մոտերքում տեղաբաշխել են 25 կործանիչ եւ գրոհիչ օդանավեր, 15 ուղղաթիռ, 9 տանկ, 5 զենիթահրթիռային համալիր, ինչպես նաեւ 500 զինծառայող: Սիրիայում ՌԴ ռազմական ներկայության աճը մտահոգել է Իսրայելին, որի վարչապետ Բենիամին Նաթանյահուն օրերս այցելեց Մոսկվա: Նրա հետ հանդիպման ժամանակ ՌԴ նախագահ Վլադիմիր Պուտինը հայտարարեց, որ ռազմական տեխնիկայի առաքման նպատակը Սիրիայի վարչակարգին օգնելն է: «Իսլամական պետություն» ահաբեկչական խմբավորման գրոհայիններից մեկը CNN-ի եթերում հայտարարել է, որ ռուսների ներկայությանն ի պատասխանՙ իրենք հարձակում կձեռնարկեն Լաթաքիայի օդանավակայանի վրա, որը «դարձել է ռուսական բանակի ռազմակայան»: Նրա խոսքերով, իսլամիստները երդվել են, որ իրենց թշնամի ռուսները «Սիրիայում խաղաղություն չեն տեսնի»: Մոսկվան նշում է, որ ինքը պայքարում է «Իսլամական պետության» դեմ: Սակայն Բաշար Ասադի կառավարությունն ունի շատ թշնամիներ: Թշնամական խմբավորումներից մեկիՙ «Իսլամի բանակի» գրոհայինները մարտահրավեր են նետել Սիրիայի կառավարական զորքերին: Իսկ հիմա նրանք թիրախ են համարում նաեւ Ռուսաստանը: Ռազմավարական հետազոտությունների միջազգային ինստիտուտի աշխատակից Էմիլ Հոկայեմը կարծում է, որ եթե Ռուսաստանն ուզում է օգնել Ասադին, ապա ստիպված կլինի կռվել թե՛ իսլամիստների եւ թե՛ սովորական ապստամբների դեմ: Ապստամբական որոշ խմբավորումներ գործակցում են Թուրքիայի հետ, ուրիշ խմբերՙ Պարսից ծոցի միապետությունների հետ: Կան մերձափնյա ստորաբաժանումներ, որոնք մտնում են ապստամբական «Ազատ սիրիական բանակի» կազմի մեջ: Այդ «բանակի» մարտիկներին արդեն մի քանի տարի պատրաստում, զենք ու տեխնիկա է մատակարարում ԱՄՆ-ը: Սիրիայում Ռուսաստանի ռազմական ներկայության ուժեղացումը տեղի է ունեցել արագորեն: Արբանյակային նոր լուսանկարներում երեւում են գերարդիական օդանավեր, տանկեր եւ զենիթահրթիռային համակարգեր: Ռուսներն իրենք խոստովանել են «Սու-30» ռազմօդանավերի ներկայությունը: CNN-ի ավագ միջազգային թղթակից Մեթյու Չանսը , խոսելով Իսրայելի վարչապետ Նաթանյահուի մոսկովյան այցի մասին, նշել է, որ նրան այդպես էլ չի հաջողվել լիովին պարզել Սիրիայում Ռուսաստանի մտադրությունները եւ թե Ասադին պաշտպանելիս որքան հեռու կարող է գնալ Մոսկվան: Նախագահ Պուտինը Նաթանյահուին ասել է լոկ հետեւյալը. «Մերձավոր Արեւելքում Ռուսաստանի գործողությունները միշտ եղել են եւ կլինեն պատասխանատու»: Այդուհանդերձ, քանի որ հակամարտությանը մասնակից են զգալի թվով շահագրգիռ կողմեր, այդ թվում Ասադի տապալմանը ձգտող ԱՄՆ-իՙ զինված ուժերը, իրադարձությունների ընթացքը կարող է դառնալ անվերահսկելի: | 
