ՊՈՒՏԻՆԻ ՁԵՌՔԻ ԳԻՆԸ ՀՈՎԻԿ ԱՖՅԱՆ Ուկրաինայի նախագահ Պետրո Պորոշենկոյի աշխատակազմից պահանջել են տեղական «112 Ուկրաինա» հեռուստաընկերությունից ցույց չտալ Պորոշենկո-Պուտին հանդիպման այն դրվագը, որտեղ երեւում է, թե ինչպես է նախագահ Պորոշենկոն սեղմում նախագահ Պուտինի ձեռքը: Հեռուստաընկերությունը, սակայն, մերժել է աշխատակազմին եւ ցուցադրել է հիշյալ հանդիպումն իր բոլոր դրվագներով: Ընդ որում, ուկրաինական եւ ոչ մի հեռուստաընկերություն (բացի վերոհիշյալից) հանդիպման այդ դրվագը ցույց չի տվել, ավելին, հոկտեմբերի 16-ին, ուկրաինական դատարաններից մեկը որոշում է կայացրել` թույլատրել «112 Ուկրաինա» հեռուստաընկերության տարածքում խուզարկությունը` ներառյալ հեռուստաընկերության համակարգչային եւ տեխնիկական սարքավորումների բռնագրավվումը` «ֆինանսական մեքենայությունների առիթով հեռուստաընկերության դեմ բացված քրեական գործի հիմքով»: Չմոռանանք, որ Ուկրաինայում վերջերս հեղափոխություն եղավ երկրում ժողովրդավարություն հաստատելու նպատակով, որի անքակտելի մասն է ազատ խոսքի իրավունքը եւ ճշմարտության բարձրաձայնումը: |
