ԲԱՐԻ՛ ԵՐԹ, «ՊԱՅՔԱՐ» ՍՈՒՐԵՆ Թ. ՍԱՐԳՍՅԱՆ Սկսած «Ազդարարից» պարբերական մամուլը մեծ դերակատարություն է ունեցել հայության կյանքում, դարձել դրա յուրատեսակ հայելին: Տարբեր ժամանակներում լույս տեսած հայ պարբերականների ամբողջությունը նաեւ մեր պատմության համար առատ կենսաղբյուր է, փաստերի շտեմարան: Իսկ յուրաքանչյուր պարբերական, լինելով այդ ամբողջի մասնիկը, նաեւ իր դեմքն ու գույնն ունի, ասելիքն ու դերակատարությունը: Հայ մամուլի ընդհանուր ներկապնակում իր հարյուրամյա անցած ճանապարհով ու կենսափորձով, նոր ու նորովի ասելիքով 2017 թ. հունվարի 1-ից սկսեց վերահրատարակվել Ռամկավար Ազատական Կուսակցության գաղափարական օրգան «Պայքար» շաբաթաթերթը: Շուրջ մեկ դար դրվատելի որակով եւ բարձրաժեք հրապարակումներով ծառայելով Ամերիկայի Արեւելյան ափի հայությանը` թերթը միաժամանակ իր աշխույժ գործունեությամբ ու հրատապ ասելիքով ներդաշնակ համագործակցում էր կուսակցության մյուս պարբերականների հետ: «Պայքար»-ը մշտապես ու անխաթար քարոզեց ՌԱԿ գաղափարախոսությունը, մերժելով կեղծիքն ու օտարամոլությունը` տեր կանգնեց հայեցի արժեքներին, զգաստ պահելով հայության ժողովրդական զանգվածներին` հրատապ հարցերի նկատմամբ Սփյուռքում, դառնալով կուսակցական մտավորականության կարեւորագույն հարթակներից մեկը: Մերօրյա համաշխարհայացման գործընթացների ու էլեկտրոնային լրատվամիջոցների բազմազանության մեջ «Պայքար»-ն ասպարեզ է վերադառնում իր առաքելության եւ ՌԱԿ-ի գաղափարախոսությունը համայն հայությանը հասցնելու հստակ գիտակցությամբ: Խիստ պատվավոր մի ընթացք, որը պետք է ապահովի գործին քաջատեղյակ, այդ ասպարեզում բեղմնավոր ճանապարհ անցած եւ ճիշտ ընտրված խմբագրակազմը` Երվանդ Ազատյանը, Հակոբ Վարդիվառյանը, Հակոբ Ավետիքյանը, դոկտ. Հարություն Արզումանյանը, Զավեն Գրիգորյանը, դոկտ. Ավետիս Եափուճյանը, Վաչե Սեմերճյանը, Պայծիկ Գալայճյանը: Լավագույնս գիտակցելով, որ մեր օրերում տպագիր մամուլը որոշ նահանջ է ապրում, խմբագրակազմն իրավացիորեն որոշել է միաժամանակ հրապարակել նաեւ թերթի էլեկտրոնային տարբերակը: Դրանով այն հասանելի կդառնա աշխարհասփյուռ ողջ հայությանը, իր ձայնը կհնչեցնի հօգուտ հայանպաստ գործերի եւ որպես ՌԱԿ-ի գաղափարական պատգամախոս, անկասկած իր նպաստավոր ազդեցությունը կունենա կուսակցական վերակառուցման եւ հիմնովին առողջացման գործընթացներում: Գաղտնիք չէ, որ տեղեկատվության պակասի կամ միակողմանիության հետեւանքով, երբեմն կուսակցական շրջանակները հայտնվում են թյուր իրողության շրջապտույտներում: Հենց այդտեսակ թյուրիմացություններից խուսափելու, կուսակցության գաղափարախոսությունն ու գործելակերպը ճիշտ ներկայացնելու անհրաժեշտության ըմբռնումով էլ խմբագրակազմը ճանապարհ է դուրս գալիս: ՌԱԿ Կենտրոնական վարչությունը եւ «Ազգ» թերթը, ողջունելով սպասված վերադարձը, բարի երթ են մաղթում «Պայքար»-ին եւ հավատացած են, որ այն ազնիվ ու անզիջում կպայքարի ստի ու խաբեության, հոսոսական դրսեւորումների, ազգավնաս ու կուսակցադավ բոլոր դրսեւորումների դեմ, ինչպես նախկինում է արել: Միաժամանակ կփոխի որոշ կարեւոր հարցերի նկատմամբ իր մոտեցումները: Նախկին եղեռնվածի ու խեղճի փոխարեն` կներկայացնի սեփական ուժեղ պետության տիրոջ եւ պահանջատեր ժողովրդի դիմագիծը: Որպես ամենամոտ ապագայում հիմնովին առողջ ու միասնական կուսակցության պաշտոնաթերթՙ կարեւոր դերակատարություն կունենա մեզ նետված մարտահրավերներին արժանիորեն պատասխանելու եւ նշագծելու այն ուղիները, որոնցով հայ ժողովուրդը կկերտի նորանոր հաղթանակներ: Մեկ անգամ էլ բարի երթ մաղթենք «Պայքար»-ին, թերթի խմբագրակազմին, բոլոր աշխատակիցներին, ներկա ու գալիք թղթակիցներին եւ սպասենք նոր համարների ու թարմ, իրատեսական, լուսառատ ու կառուցողական խոսքի: |
