ՍԵՐԺ ՍԱՐԳՍՅԱՆԸ ՆԵՐԵԼ Է ՎԱԶԳԵՆ ԽԱՉԻԿՅԱՆԻՆ Վանաձորի ՔԿՀ-ից ազատ է արձակվել սոցիալական ապահովության ծառայության նախկին պետ Վազգեն Խաչիկյանը: Արդարադատության նախարարության քրեակատարողական ծառայության հանրային կապերի բաժնի պետ Գոռ Ղլեչյանը հայտնել է, որ Խաչիկյանն ազատ է արձակվելՙ «պատժի լրիվ կրումով»: Հիշեցնենք, որ Խաչիկյանը մեղադրվում էր պաշտոնի չարաշահմամբՙ պետական բյուջեից յուրացումներ կատարելու համար: Արդյունքում պետությանը հասցվել էր 267 միլիոն 583 հազար 336 ՀՀ դրամի վնաս: Նա կալանավորվել էր 2012-ին, իսկ 2014-ի դեկտեմբերի 8-ին Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Արշակ Վարդանյանի դատավճռով դատապարտվել էր 12 տարվա ազատազրկման: Ստացվում է, որ 12 տարի ազատազրկված Խաչիկյանը միայն 5 տարի է անցկացրել անազատության պայմաններում: Բոլորովին վերջերս էլ Խաչիկյանը ներման խնդրանքով դիմել էր ՀՀ նախագահին, որն էլ, պարզվում է, ներել է: | 
