ԳԵՐՄԱՆԱ-ՖՐԱՆՍԻԱԿԱՆ ԼՐԱԳՐՈՂԱԿԱՆ ԲԱՐՁՐԱԳՈՒՅՆ ՊԱՐԳԵՎ ՅՈՒՐԳԵՆ ՀԱԲԵՐՄԱՍԻՆ ԱՆԱՀԻՏ ՀՈՎՍԵՓՅԱՆ Մեր ժամանակների խոշորագույն մտավորականներից մեկինՙ դոկտոր պրոֆեսոր Յուրգեն Հաբերմասին հուլիսի 5-ին շնորհվեց գերմանա-ֆրանսիական լրագրողական բարձրագույն մրցանակը: Բեռլինում հրավիրված հանդիսավոր արարողության ժամանակ գերմանացի նշանավոր փիլիսոփայի, սոցիոլոգի մասին գովասանաճառում ԳԴՀ արտգործնախարար Հայկո Մաասը նրան արժեւորել է որպես spiritus rector-իՙ ոգու առաջամարտիկի, «Գերմանիայի եւ Ֆրանսիայի միջեւ մտավոր կամուրջ կապողի », Գերմանիայի Դաշնային Հանրապետության սկզբնավորումից ի վեր նրաՙ անշեղ ուղեկցի: Հաբերմասին շնորհավորական ուղերձ է հղել նաեւ Ֆրանսիայի նախագահ Մակրոնը: 1983-ից ի վեր լրագրողներին հանձնվող գերմանա-ֆրանսիական ամենամյաՙ 35-րդ մրցանակը 30 000 եվրո պարգեւավճարով, տրվում է լրագրության տարբեր բնագավառներումՙ գերմանա-ֆրանսիական եւ եվրոպական փոխըմբռնմանը, միավորմանը նպաստող ստեղծագործություններին: Հաբերմասից առաջ այդ մրցանակին արժանացել են նաեւ գերմանացի եւ ֆրանսիացի այլ ստեղծարարներ: Ուրախ ենք, որ Հայաստանում թարգմանում են Հաբերմասի աշխատությունները: |
