ՀԱՅԿԱԿԱՆ ԹԵՄԱՆԵՐ ԻՏԱԼԱԿԱՆ ԱՐԴԻ ԹԱՏՐՈՆՈՒՄ ԵՎ ԿԻՆՈՅՈՒՄ Ա. Բ. Անցած հուլիսին Իտալիայի Սան Մինիատո քաղաքում (ի դեպ, անվանված ի պատիվ մ. թ. 3-րդ դարում ապրած հայազգի սուրբ Մինասի) տեղի ունեցած 72-րդ թատերական փառատոնում ներկայացվել է «Նարեկ. մի հայկական բանաստեղծություն» բեմադրությունը, որը Երեւանի Փոքր թատրոնի եւ իտալական «Վերսիլիադանցա» պարային թատերախմբի համատեղ նախագիծն է: Ներկայացման գաղափարի հեղինակը եւ բեմադրիչը Վահան Բադալյանն է, պարադիրըՙ Անջելա Տոռիանի Էվանջելիստին : Բեմադրությանը մասնակցել են հայ եւ իտալացի արտիստներ: Գրիգոր Նարեկացու «Մատեան ողբերգութիւնից» հատվածները հնչել են Լեւոն արք. Զեքիյանի իտալերեն թարգմանությամբ: Փառատոնի շրջանակներում կայացել է նաեւ «Իմ անուշ Հայաստանից» վերտառությամբ ցուցահանդես, որը կազմակերպել էր լուսանկարիչ եւ հրատարակիչ Անդրեա Ուլիվին : Անցյալ ամառ Իտալիայում կայացել է նաեւ Սիմոնե Սպադայի «Հյուրանոց «Գագարին» խաղարկային լիամետրաժ կատակերգական կինոնկարի առաջնախաղը: Ֆիլմի հերոսներն իտալացի կինոգործիչներ են, որոնք գալիս են ձմեռային Հայաստանՙ կինոնկար նկարահանելուՙ առանց իմանալու, թե ինչ է սպասվում այդ անծանոթ երկրում իրենցից յուրաքանչյուրին: Ֆիլմի նկարահանումները կատարվել են Սեւանա լճի ափին: Հատկանշական է նաեւ, որ կինոնկարի ազդագրին առկա է «Բարի գալուստ Հայաստան» մակագրությունը: | 
