ԱԼԵՔՍԻՍ ՕՀԱՆՅԱՆԻ «ՇԱԿՄԱՏ» ԲՐԵՆԴԻՆ Հ.Ծ. Սիլիկոնյան հովտում հռչակ վայելող, «Reddit» առցանց հարթակի համահեղինակ, միլիոնատեր Ալեքսիս Օհանյանը , որի մասին «Ազգ»ը ժամանակին գրել է, հրապարակ է հանել իր նոր բիզնես արտադրանքը, հայկական կոնյակը, որին տվել է «Shakmat» անունը: Թենիսի «գերաստղ» հռչակված Սերենա Ուիլյամսի ամուսինը, որ անցյալ տարի նաեւ բախտավորվեց իր հենց առաջին զավակով, վստահ է, որ հայկական կոնյակը ավելի լավ ճանաչման կարիքն ունի աշխարհում: Նրա թողարկածը 23 տարվա հնության, 40 տոկոս ալկոհոլ պարունակող խաղողի հումքով պատրաստված կոնյակ է, որի «Շախմատ» անունը իր իսկ խոստովանությամբ շատ հարազատ է իրեն, որովհետեւ այն պարունակում է իր մեջ «համբերություն, խելացի, մտածված քայլեր եւ գիտելիքների հնարամիտ օգտագործում, արժեքներ, որոնց մեծ կարեւորություն եմ տալիս ես»: Բրուքլինում ծնված, Ցեղասպանությունից փրկվածների ծոռը Հայաստանի եւ իր արմատների հետ ծանոթացել է Վերա անունով մեծ հորաքրոջ միջոցով: Ալեքսիսի հայրըՙ Քրիսը հայ է, իսկ մայրըՙ Անքենՙ գերմանուհի: Հայաստան է այցելել 2010 թվին, որտեղ ականատես է եղել, թե ինչ կարեւորություն է տրվում շախմատին: Նրա գործընկերն է «Ֆլավիար» ոգելից խմիչքների ակումբը, որն արդեն ունի իր մշտական հաճախորդները, որոնց համար նոր ատադրանքը վաճառվում է 95 դոլարով: Առցանց առեւտուր անողների համար այն 110 դոլար արժի: Առայժմ թողարկվել է 2.400 շիշ: Հետագայում արտադրանքի քանակը ավելանալու է, վստահեցնում է Ալեքսիսը: |
