ԱՎՍՏՐԻԱԿԱՆ «ԴԵՐ ՇՏԱՆԴԱՐԴ»-Ը ՈՒՐՎԱԳԾՈՒՄ Է ՓԱՇԻՆՅԱՆԻ ԻՇԽԱՆՈՒԹՅԱՆ ԱՎԱՐՏԸ ԱՆԱՀԻՏ ՀՈՎՍԵՓՅԱՆ Ավստրիական «Դեր Շտանդարդ» թերթում Հարավային Կովկասի հարցերի փորձագետ Էլքան Նուրիեւը փետրվարի 15-ին անդրադարձել է Հայաստանի քաղաքական ճգնաժամին, ներկայացրել վարչապետ Փաշինյանի քաղաքական ծանր կացությունը: Համառոտենքՙ վարչապետի թիմին չի հաջողվել մի շարք արդի մարտահրավերներ հաղթահարել, ինչն ուղղակիորեն հանգեցրել է իշխանական կոնֆլիկտի եւ ինստիտուցիոնալ ճգնաժամի: «Թավշյա հեղափոխության» բարեփոխումներից ակնկալիքներ ունեին ինչպես երկրում, այնպես էլ ԵՄ-ում, իսկ այժմ Ղարաբաղի տանուլ տված պատերազմը, անկայուն արտաքին քաղաքականությունը, անցյալ տարվանից նկատելի դարձածՙ իշխանությունը պահպանելու չափազանցված մտասեւեռումը, հանրության մեջ նվազեցրին Փաշինյանի հանդեպ վստահությունը: «Դեր Շտանդարդը» գծում է Փաշինյանի «ավտորիտար դեմքը», որ գահընկեց լինելու վախից, իր դեմ ելած խաղաղ ցուցարարների հանդեպ ուժային ծանր մեթոդներ է կիրառում: Լավ կլինի իշխանական թիմում կարդան հենց նման հոդվածները: |
