ԳԵՐՄԱՆԱՑԻ ԶԻՆԾԱՌԱՅՈՂՆԵՐԸՙ ՈՏՆՁԳՈՒԹՅԱՆ ԹԻՐԱԽ ԹՈՒՐՔԻԱՅՈՒՄ Հ. Չ. Դրան հակազդեցությամբ արձագանքել է գերմանական մամուլը Անցյալ տարվա վերջին ամիսներին Թուրքիայի օրակարգը առաջնահերթ նշանակությամբ զբաղեցնում էր երկրի տարածքում «Փեթրիոթ» հակահրթիռային համակարգեր տեղակայելու հարցը: Դրա անհրաժեշտությունը վարչապետ Էրդողանի կառավարությունը բացատրում էր Սիրիայի հնարավոր հարձակման հավանականությամբ, իսկ այդ համակարգերը թուրքական կողմին տրամադրող ԱՄՆ-ը, Գերմանիան եւ Հոլանդիան տուրք էին տալիս թուրքերի նկրտումներին: Ընդ որում «Փեթրիոթների» տեղակայմանը դեմ էին ոչ միայն խորհրդարանական ընդդիմադիր բոլոր 3 կուսակցությունները, այլեւ ժողովրդի մեծամասնությունը, մասնավորապես Սիրիային սահմանակից շրջանների բնակիչները, որոնք բազմիցս հանդես են եկել բողոքի ցույցերով ինչպես «Փեթրիոթների», այնպես էլ «Ազատ Սիրիայի բանակի» տեղաբաշխման դեմ: Համենայն դեպս երկրի տարածքում «Փեթրիոթների» տեղակայման եւ գործարկման աշխատանքների համար 350 գերմանացի զինծառայող դեռեւս անցյալ տարվա վերջերին գործուղվել էր Թուրքիա: Հունվարի 21-ին էլ Իսկենդերունի նավահանգիստ են հասել հոլանդական եւ գերմանական հակահրթիռային համակարգերով բեռնված նավերը: Ինչ վերաբերում է ամերիկյան համակարգերին, ապա դրանք, ինչպես երեկ նշել էր «Դունիա բուլթենի» լրատվական գործակալությունը, պահեստավորված են «Ինջիռլիքի» ռազմաօդային բազայում: «Փեթրիոթները» կտեղակայվեն Իսկենդերունից 200 կմ հեռավորության վրա գտնվող Մարաշի շրջակայքում եւ փետրվարի սկզբին, ինչպես խոստացել են գերմանացի զինծառայողները, պատրաստ կլինեն գործարկման: Խնդիրը սակայն սոսկ «Փեթրիոթները» չեն, այլ այս համակարգերի հետ նաեւ օտարերկրացի զինծառայողների տեղաբաշխումը երկրում առանց Թուրքիայի ազգային մեծ ժողովի համապատասխան որոշման, որը հակասում է թուրքական սահմանադրության 92-րդ հոդվածին, ինչպես նաեւ բախվում է սահմանամերձ շրջանների բնակչության հակազդեցությանը: Այս հակազդեցությունը, «Դունիա բուլթենի» կայքէջի վկայությամբ, հանգեցրել է ոտնձգության հենց Իսկենդերուն քաղաքում. գերմանացի 5 զինծառայող քաղաքի կենտրոնում ենթարկվել է ամբոխի հարձակման, մյուսները հալածանքի խանութում կամ շուկայում: Թեեւ թուրքական անվտանգության ուժերը միջամտել եւ անվնաս զորամաս են հասցրել հարձակման ենթարկված գերմանացի զինծառայողներին, սակայն գերմանական մամուլը կայքէջերում հակազդեցությամբ իսկույն արձագանքել է թուրքական ոտնձգությունների բոլոր մանրամասներին: | 
