ՀԵՆՐԻԽ ՄԽԻԹԱՐՅԱՆ. «ՀԱՃՈՒՅՔՈՎ ԿԽԱՂԱՅԻ ԱՊՀ ԱՌԱՋՆՈՒԹՅՈՒՆՈՒՄ» Արաբական Միացյալ Էմիրություններում «Զենիթի» հետ կայացած հանդիպումից հետո Sportbox.ru կայքի թղթակիցը զրուցել է «Շախտյորի» եւ ՀՀ ազգային հավաքականի կիսապաշտպան Հենրիխ Մխիթարյանի հետ: - Ինչո՞ւ «Շախտյորն» այդպես հեշտությամբ հաղթեց «Զենիթին»: - Կարծում եմ, որ թիմերը գտնվում են նախապատրաստական տարբեր փուլերում: Դրանով էլ պայմանավորված է այն փաստը, որ մենք մրցակցից ավելի թարմ էինք: Հանդիպումը մեզ համար սկզբունքային նշանակություն չուներ, սովորական ընկերական խաղ էր: Սակայն լավ է, որ հաղթեցինք: Այժմ լավ տրամադրությամբ կնախապատրաստվենք Copa del Sol գավաթի խաղարկությանը, որը կայանալու է Իսպանիայում: - Խաղից առաջ «Զենիթի» խաղային սխեման քննարկե՞լ եք: - Ոչ: Կենտրոնացել ենք միայն մեր խաղի վրա: Մարզիչը բացատրեց, թե ինչպես պետք է գործենք: - Խոսակցություններ կային, թե տեղափոխվելու ես «Զենիթ»: - Ինձ համար դրանք միայն խոսակցություններ են: Ներկայումս «Շախտյորի» խաղացող եմ եւ ուրիշ ոչ մի բանի մասին չեմ մտածում: - Ի՞նչ կասես ներկայումս լայնորեն քննարկվող ԱՊՀ-ի լիգա ստեղծելու գաղափարի մասին: - Դա ֆուտբոլային չինովնիկների գործն է: Անձամբ ինձ համար հաճելի կլիներ ԱՊՀ երկրների առաջնությունում մշտապես խաղադաշտ դուրս գալ ոչ միայն Ուկրաինայի առաջնության մասնակիցների, այլեւ տարբեր երկրների թիմերի հետ հանդիպումներում: - Որքանո՞վ եք ներկայումս պատրաստ «Բորուսիայի» հետ չեմպիոնների լիգայի 1/8 եզրափակիչի մրցավեճին: - Պատրաստվածության աստիճանը տոկոսներով չեմ կարող գնահատել: Դա մարզիչը կարող է ասել: Կմարզվենք նրա ցուցումներով: Համոզված եմ, որ «Բորուսիայի» հետ մրցավեճին մարտական պատրաստվածությամբ կներկայանանք: Չէ՞ որ մինչ այդ մի շարք հանդիպումների ենք մասնակցելու: - Ինչո՞ւ ակումբներում իրենց վառ դրսեւորող հայ ֆուտբոլիստները նույն կերպ չեն խաղում հավաքականում: - Դժվար է ասել: Հավաքական հրավիրվող բոլոր ֆուտբոլիստներն էլ ամեն ինչ անում են, որպեսզի օգնեն մեր ընտրանուն հաղթելու: Յուրաքանչյուրը ներդնում է իր լրիվ ուժերը: Չեմ կարծում, թե որեւէ մեկն այդ հարցում թերանում է: - Դու դարձար ԱՊՀ երկրների 2012-ի լավագույն ֆուտբոլիստ: Ցանկություն չունե՞ս երջանկություն որոնել Արեւմտյան Եվրոպայում: - Ես գործող պայմանագիր ունեմ «Շախտյորի» հետ, ուստի այդ հարցի առնչությամբ ոչինչ ասել չեմ կարող: | 
