ԱՐՈՆՅԱՆԸ ՇԱՐՈՒՆԱԿՈՒՄ Է ԿԱՌԼՍԵՆԻ ՀԵՏԱՊՆԴՈՒՄԸ Վեյք Ան Զեեի մրցաշարի 10-րդ տուրը հաղթական էր Լեւոն Արոնյանի համար, որն արդեն 38-րդ քայլին ստիպեց հանձնվել չինացի գրոսմայստեր Վան Հաոյին: Այդ հաջողության շնորհիվ Արոնյանը 6,5 միավորով հավասարվեց Վիշվանաթան Անանդին, որը հաշտություն կնքեց Սերգեյ Կարյակինի հետ: Ավելի ուշ նրանց միացավ նաեւ ճապոնացի գրոսմայստեր Հիկարու Նակամուրան, որը պարտության մատնեց իտալացի Ֆաբիանո Կարուանային: Վերջինս ունի 4,5 միավոր: Իսկ մրցաշարային աղյուսակը 8 միավորով շարունակում է միանձնյա գլխավորել Մագնուս Կառլսենը, որը հերթական հաղթանակը տոնեց Էրվին Լ Ամիի հետ մրցախաղում: Վերջինս 3 միավորով 13-րդ տեղում է: Մրցաշարում իր 2-րդ հաղթանակը տոնեց հունգարացի գրոսմայստեր Պետեր Լեկոն, որի մրցակիցն Իվան Սոկոլովն էր: Լեկոն վաստակեց 5,5 միավոր: Նույնպիսի արդյունք ունի նաեւ Սերգեյ Կարյակինը: Մրցաշարում անհաջող հանդես եկող աշխարհի նախկին չեմպիոնուհի Հոու Յիֆանը 2-րդ հաղթանակը տոնեց Պենտալա Հարիկրիշնայի հետ մրցախաղում: Յիֆանը վաստակեց 3,5 միավոր եւ աղյուսակի վերջին հորիզոնականը զիջեց 2,5 միավոր ունեցող Իվան Սոկոլովին: Այսօր մրցաշարում հանգստյան օր է, իսկ վաղը կկայանան 11-րդ տուրի հանդիպումները: Լեւոն Արոնյանը սեւերով կմրցի Հիկարու Նակամուրայի հետ, Կառլսենի մրցակիցը կլինի Վան Հաոն: Կկայանան նաեւ Լեկո-Վան Վելի, Կարյակին-Սոկոլով, Յիֆան-Անանդ, Լ Ամի-Հարիկրիշնա, Գիրի-Կարուանա պարտիաները: B խմբի մրցաշարի միանձնյա առաջատար Սերգեյ Մովսիսյանը 10-րդ տուրում կարճատեւ պայքարից հետո 23-րդ քայլին հաշտություն կնքեց Դանիլ Դուբովի հետ: 10 տուրից հետո Մովսիսյանն ունի 7 միավոր: Նրան միավորներով հավասարվեց Ռիխարդ Ռապորտը, որը հաղթեց Ալեքսանդր Իպատովին: 6,5-ական միավորով առաջատարներին հետապնդում են Արկադի Նայդիչը եւ Յան Սմիթսը: Նայդիչը ոչ-ոքի խաղաց Պրեդրագ Նիկոլիչի հետ, իսկ Սմիթսը հաղթեց Սիպկե Էռնստին: C խմբի մրցաշարում բրազիլահայ Գրիգոր-Սեւակ Մխիթարյանը 58-րդ քայլին պարտվեց Իսրայելի ներկայացուցիչ Իգոր Բիտենսկուն: Վերջինս վաստակեց 5 միավոր եւ հավասարվեց Մխիթարյանին: | 
