«ՄԻԿԱՆ» ԱՌԱՋԻՆ ՀԱՎԱՔԸ ԿԱՆՑԿԱՑՆԻ ԿԻՊՐՈՍՈՒՄ 2012/13-ի ֆուտբոլի Հայաստանի առաջնության ավարտական փուլի հանդիպումներին նախապատրաստվող «Միկան» մարզումները վերսկսել է հունվարի 21-ից: Թիմի մարզաբազայում ֆուտբոլիստները Ժոլտ Հոռնյակի գլխավորությամբ ամենօրյա ծանրաբեռնված պարապմունքներ են անցկացնում: «Շիրակի» հետ երկրի չեմպիոնի տիտղոսի համար պայքարող «Միկան» ձմռանը 2 զգալի կորուստ ունեցավ: Թիմի հիմնական դարպասապահ Գեւորգ Կասպարովը մինչեւ այս տարվա օգոստոսի 1-ը պայմանագիր է կնքել Իրանի «Զոբ Ահանի» հետ, որի կազմում հաջող մրցելույթներ է ունենում: Իսկ «Միկայի» արդյունավետ հարձակվողներից մեկըՙ Նարեկ Բեգլարյանը մինչեւ առաջնության ավարտը վարձավճարով հանդես է գալու Կապանի «Գանձասարում»: «Միկան» մինչեւ փետրվարի 11-ը մարզումները կշարունակի Երեւանում, իսկ հաջորդ օրը կմեկնի Կիպրոս, որտեղ ուսումնամարզական առաջին հավաքը կանցկացնի: Այնտեղ նախատեսված է 4 ընկերական հանդիպում անցկացնել: Մրցակիցներից 2-ն արդեն հայտնի են: Առաջին խաղը «Միկան» կանցկացնի փետրվարի 18-ինՙ մրցելով ՌԴ առաջին խմբի առաջնության մասնակից «Ուֆայի» հետ: Հիշեցնենք, որ այդ թիմում է խաղում ՀՀ հավաքականի թեկնածու Միխայիլ Մարկոսովը: Փետրվարի 21-ին «Միկան» ուժերը կչափի Օրենբուրգի «Գազովիկի» հետ: Մյուս 2 մրցակիցները դեռեւս անհայտ են: | 
