ՆՈՐԱՅՐԸ ՀԱՆԴԵՍ ԿԳԱ ԱՍԼԱՆՅԱՆ ԱԶԳԱՆՈՒՆՈՎ Հոլանդական «Էմեն» ակումբում հանդես եկող Նորայր Մամեդովը ֆուտբոլի Հայաստանի ֆեդերացիայից հրավեր է ստացել մասնակցելու փետրվարի 5-ին Վալանսում կայանալիք Հայաստան-Լյուքսեմբուրգ հանդիպմանը: Մամեդովը armsport.am կայքին տեղեկացրել է, որ արդեն փոխել է ազգանունը: Նա այսուհետ կրելու է Ասլանյան ազգանունը, որը գրանցված է նրա նոր անձնագրում: Նորայրը նաեւ տեղեկացրել է, որ ինքը շատ է ցանկանում ներկա գտնվել ՀՀ հավաքականի ընկերական այդ հանդիպմանը, ուստի խնդրելու է թիմի գլխավոր մարզչին, որպեսզի թույլատրի մեկնելու Ֆրանսիա: Բանն այն է, որ Հոլանդիայի 1-ին խմբի խաղացանկով այդ օրերին հանդիպումներ են նախատեսված: Հիշեցնենք, որ Նորայրն անցյալ տարի էր գրավել Հայաստանի հավաքականի մարզիչների ուշադրությունը: Սակայն ազգանվան հետ կապված խնդիրների պատճառով նրա նորամուտը հետաձգվեց: | 
