ՀԱՅ ԹԵԹԵՎԱՏԼԵՏՆԵՐԸ ՎԹԱՐԻՑ ՉԵՆ ՏՈՒԺԵԼ Բալկանյան լիգային մասնակցելու համար Ստամբուլ մեկնելիս Թուրքիայի Սամսուն քաղաքի մոտակայքում շրջվել էր Հայաստանի թեթեւ ատլետիկայի հավաքականին տեղափոխող ավտոբուսը: Սկզբնական շրջանում լուրեր էին տարածվել, թե իբր վթարի հետեւանքով հայ մարզիկներից շատերը մարմնական լուրջ վնասվածքներ են ստացել ու տեղափոխվել են հիվանդանոց: Բարեբախտաբար, այդ լուրերը իրականությանը չեն համապատասխանում: Ինչպես ՀՀ սպորտի եւ երիտասարդության հարցերի նախարարության լրատվական բաժնին տեղեկացրել է թեթեւ ատլետիկայի Հայաստանի ֆեդերացիայի գլխավոր քարտուղար Նարինե Շահբազյանը , Հայաստանի մարզական պատվիրակության անդամներից ոչ մեկը լուրջ վնասվածքներ չի ստացել: Վթարից հետո նոր ավտոբուս է տրամադրվել, որով մեր մարզիկները հասել են Ստամբուլ ու մասնակցել մրցումներին: Առաջնության արդյունքներով Հայաստանի կանանց հավաքականը Ռումինիայի, Թուրքիայի, Բուլղարիայի, Մակեդոնիայի, Խորվաթիայի, Սերբիայի, Ալբանիայի, Հունաստանի, Մոլդովայի, Բոսնիայի եւ Չեռնոգորիայի ներկայացուցիչների հետ պայքարում զբաղեցրել է 5-րդ հորիզոնականը: Մեր տղամարդկանց հավաքականը գրավել է 9-րդ տեղը: Ընդհանուր առմամբ մրցումներին մասնակցել են հայաստանցի 14 թեթեւատլետներ: | 
