ՀԱՂԹԱԿԱՆ ԱՎԱՐՏ Անթալիայում ուսումնամարզական հավաքը հաղթանակով ավարտեց «Ալաշկերտը», որը ստուգողական վերջին խաղում 2-1 հաշվով պարտության մատնեց Հարավաֆրիկյան Հանրապետության պրեմիեր լիգայի առաջնության առաջատար «Կայզեր Չիֆզին»: «Ալաշկերտը» բավականին արդյունավետ օգտագործեց նախապատրաստական շրջանըՙ հաջող հանդես գալով ստուգողական հանդիպումներում: Ակումբի ղեկավարությունը մտածելով հերթափոխի մասին, կազմավորել է նաեւ դուստր թիմՙ «Ալաշկերտ-2»: Վերջինս օգոստոսին մեկնարկող Հայաստանի առաջնությունում հանդես կգա 1-ին խմբում, իսկ «Ալաշկերտը» նորամուտը կնշի ուժեղագույնների մրցաշարում: «Ալաշկերտ-2»-ը «Միկա-97»-ի հետ խաղում հաղթել է 2-1 հաշվով: Երեկ «Ալաշկերտը» վերադարձավ Երեւան, որտեղ կսկսի անմիջական նախապատրաստությունը մարտի 2-ին «Նաիրի» մարզադաշտում կայանալիք ՀՀ գավաթի քառորդ եզրափակիչի առաջին հանդիպմանը: Հիշեցնենք, որ այդ փուլում «Ալաշկերտի» մրցակիցը Կապանի «Գանձասարն» է: Ի դեպ, «Նաիրի» մարզադաշտն արդեն «Ալաշկերտի» սեփականությունն է: Ակումբը վերջերս գնել է մարզադաշտը: Ուրախալի է, որ «Ալաշկերտը» չարժանացավ նորաստեղծ մեկ այլ ակումբիՙ «Քինգ Դելյուքսի» ճակատագրին, որն անցած տարվա կեսերին լուծարվեց: | 
