«ՔԱՂԱՔԱԿԱՆ ԷՄԱՆՍԻՊԱՑԻԱ»` ԱԴՐԲԵՋԱՆԱԿԱՆ ՁԵՎՈՎ ՎԱՀՐԱՄ ԱԹԱՆԵՍՅԱՆ Պարզվում է, հարեւան երկրում «ազատորեն գործող» հասարակական կազմակերպություններից մեկն էլ կոչվում է «Ակսակալների խորհուրդ», որ վերջերս գումարեց հերթական 6-րդ համագումարը: Եվ, «պաշտպանելով աշխատավորների շահերը ներկայացնող` արհմիութենական կազմակերպությունների համադաշնության միակ ճիշտ որոշումը», իր հերթին հավանություն տվեց, որ «նախագահի ծանր եւ պատասխանատու աշխատանքը» երրորդ ժամկետով շարունակի կատարել «համազգային առաջնորդի գործի արժանավոր շարունակող» Իլհամ Ալիեւը: «Ակսակալների խորհրդի» համագումարին, չգիտես ինչու, ներկա չէր Հեյդար Ալիեւի հարազատ եղբայրը` ակադեմիկոս Ջալալ Ալիեւը: Բացակա էր նաեւ Ռամիզ Մեհթիեւը: Փոխարենը առիթն օգտագործել եւ սեփական հեղինակության «Տնտեսագիտական հանրագիտարանը» շնորհանդեսի էր ներկայացրել ակադեմիկոս, Միլլի մեջլիսի տնտեսական հարցերի կոմիտեի նախագահ, նախկինում Ադր. ԿԿ Կենտկոմի քարտուղար Զիադ Սամեդզադեն: Հունձքը չափազանց առատ էր. դահլիճի նախասրահ տարված «հանրագիտարանի» բոլոր օրինակներն սպառվեցին կայծակնային արագությամբ` մեկ օրինակը 50 մանաթով: Այլ կերպ չէր լինի: Սամեդզադեն հասցրել էր շատերին ի լուր տեղեկացնել, որ «հանրագիտարանն ստեղծվել է, որպեսզի ցույց տրվի, թե ինչպիսի տնտեսական հաջողությունների է հասել Ադրբեջանը` շնորհիվ Հեյդար Ալիեւի մշակած զարգացման հայեցակարգի»: Այդքանից հետո ո՞վ կհանդգներ խնայողություն անել եւ իր հետ տուն չտանել «Տնտեսագիտական հանրագիտարանի» բոլոր հինգ հատորներից գոնե մեկական օրինակ: Փառք աստծո, որ հավաքվածները ոչ թե շարքային, այլ տիտղոսակիր-ձեռնարկատեր ակսակալներ էին: Բայց զավեշտն առջեւում էր: «Ակսակալների խորհրդի» համագումարի ծափողջույնները դեռ չէին մարել, երբ մամուլում տեղեկատվություն հայտնվեց, որ սեփական հասարակական կազմակերպություն հիմնադրելու եւ քաղաքական գործընթացներին մասնակից դառնալու հայտ են ներկայացրել նաեւ... «սպիտակահեր կանայք»: Եթե «ճերմակամորուս» շողոքորթները կարող են համագումար հրավիրել, պաշտպանել «համազգային թեկնածու» Իլհամ Ալիեւին, ապա հանուն էմանսիպացիայի եւ սոցիալական արդարության նույնը չպիտի՞ անեն նաեւ «ճերմակահեր կանայք»: Ահա այս հիմնավորմամբ էլ ստեղծվել է «Ճերմակահեր կանանց» հասարակական կազմակերպություն ստեղծելու նախաձեռնող խումբ: Բայց հայտնի չէ` ում գլխավորությամբ: Իսկ նախաձեռնողների ինքնությունը չի հրապարակվում, քանի որ վարչախումբը դեռեւս չգիտի` «ճերմակահեր կանայք» իրո՞ք Իլհամ Ալիեւի թեկնածությունն են պաշտպանելու, թե՞ «կանանց գունդ զորաշարժելու» գաղափարը պատկանում է Մեհրիբան Ալիեւային, եւ դրա տակ ինտրի՞գ կա: Մեկ էլ տեսար «ճերմակահեր կանայք» հավաքվեցին եւ նախագահի թեկնածու առաջադրեցին Մեհրիբան խանումին... Ահա այս հարցականի վրա էլ Ադրբեջանում առկախվել է «քաղաքական էմանսիպացիան»: Կա թերեւս ուրիշ մտահոգություն էլ. Միլլի մեջլիսի նիստում պատգամավոր Ֆազաիլ Աղամալին պնդել է, որ «շատ բարձրաստիճան պաշտոնյաների մայրեր հայ են»: Գուցե վարչախումբը զգուշանում է, որ «ճերմակահեր կանանց» կազմակերպությանը նաեւ Աղամալիի նշած պաշտոնյաների մայրերը կանդամագրվե՞ն... | 
