ՇՆԱՁԿԱՆԸ ՀԱՂԹԱԾ ԲՐԻՏԱՆԱՑՈՒՆ ՀԵՌԱՑՐԻՆ ԱՇԽԱՏԱՆՔԻՑ Ավստրալիայի լողափերից մեկի մոտ շնաձկանը հաղթած բրիտանացի զբոսաշրջիկ Փոլ Մարշալսին տուն վերադառնալուց հետո հեռացվել է աշխատանքից: Այս միջադեպի մասին տեղեկացնող Ֆրանսպրեսը նշում է որոշ մանրամասնություններ: Պարզվում է, որ Ավստրալիա մեկնելուց առաջ բրիտանացին բուժման նպատակով արձակուրդ էր վերցրել բարեգործական կազմակերպությունից, որտեղ նա աշխատում էր: Սակայն կազմակերպության աշխատակիցները շատ զարմացել էին, երբ ԶԼՄ-ներում տեսել էին Ավստրալիայում շնաձկանը հաղթած իրենց «հիվանդ» գորընընկերոջը: Կազմակերպությունը Մարշալսիին փոստով ծանուցել էր նրա ազատման մասին: 62-ամյա բրիտանացին այս կապակցությամբ արտահայտել է իր դժգոհությունը: «Մեր քաղաքում այնքան էլ շատ գործ չկա շնաձկների դեմ պայքարողների համար», ասել է Մարշալսին, որը կնոջ եւ երեք զավակների հետ ապրում է Մերտիր-Թիդվիլ փոքր բնակավայրում: Նա ակնկալում էր, որ բարեգործական կազմակերպությունը (որն օգնում է երեխաներին), ընդհակառակը, շնորհակալություն կհայտնի իր խիզախ արարքի համար, քանի որ ինքը շնաձկան հարձակումից փրկել է լողափի երեխաներին: Ավստրալիայում հերոսացված բրիտանացին պարզաբանել է, որ ինքն արձակուրդ էր վերցրել սթրեսի պատճառով. բժիշկը խորհուրդ էր տվել ընտանյոք մի քանի օր անցկացնել ծովափին: Մարշալսին Ավստրալիայում էր հունվարի վերջերին: Անզեն բրիտանացին լողափի մոտ հայտնված շնաձկանը հեռացրել էր նրա պոչից քաշելով, իսկ հետո գիշատիչն ինքն էր հեռացել: Փրկարարը չէր տուժել, թեեւ շնաձուկը փորձել էր կծել նրա ոտքը: «Սքայ նյուզ» հեռուստաալիքին տված հարցազրույցում Մարշալսին ասել է, որ շնաձկան հայտնվելու հավանական պատճառը եղել է կամ հիվանդությունը, կամ էլ սաստիկ քաղցը: | 
