ԱՆՆԱ ՊՈՂՈՍՈՎԱՅԻ ՄԵՆԱՀԱՄԵՐԳԸ Վիրահայոց թեմի մամլո դիվան Մարտի 10-ին Վիրահայոց թեմի «Հայարտուն» մշակույթի կենտրոնում կայացավ հայ երգի շնորհալի կատարող, տարբեր մրցույթների եւ փառատոների մասնակից Աննա Պողոսովայի մենահամերգը, որը նվիրված էր Կանանց միջազգային օրվանՙ Մարտի 8-ին: Աննա Պողոսովան դեռ մանուկ հասակից աչքի էր ընկնում երգի, պարի եւ երաժշտության նկատմամբ ունեցած հակումներով: Լեփ-լեցուն դահլիճում հնչեցին հանրահայտ եւ սիրված երգեր ինչպես հայկական, այնպես էլ վրացական եւ արտասահմանյան երգացանկից, դառնալով Աննա Պողոսովայի շնորհավորանքը բոլոր կանանցՙ Մարտի 8-ի կապակցությամբ: Համերգի ժամանակ մենակատարուհու երգն ուղեկցվում էր Վանո Մկրտչյանի դուդուկի եւ Պավել Օգանեզովիՙ դաշնամուրի նվագակցությամբ: Մենահամերգը համեմված էր նաեւ Թբիլիսիի թիվ 104 դպրոցի աշակերտուհի Լիզա Թորոսյանի գեղեցիկ ասմունքով: Ավելացնենք, որ 2012 թվականին Աննան մասնակցեց «Իմեդի» հեռուստատեսության «Նուցա սկոլա» նախագծին, հասնելով կիսաեզրափակիչ, իսկ տարեվերջին երիտասարդ երգչուհին դարձավ Երեւանում ամեն տարի անցկացվող «Մենք երգում ենք Առնո Բաբաջանյանի երգերը» երրորդ մրցույթ-փառատոնի հաղթող եւ արժանացավ չորրորդ հանրապետական ուսանողական մրցույթ-փառատոնը բացելու մեծ պատվին: | 
