ՌԱՖԱՅԵԼ ԶԱՄԲՌԶԻՍԿԻ-ՊԵՅՆ. «ՀԱՅԿԱԿԱՆ ՄՇԱԿՈՒՅԹԸ ՆԵՐԿԱՅԱՑՄԱՆ ԿԱՐԻՔ ՉՈՒՆԻ» Մ. Հ. Արամ Խաչատրյան համերգասրահում երեկ գիշեր Հայաստանի պետական երիտասարդական նվագախումբը եւ RP Musical management կազմակերպության եւ ՀՀ-ում Մեծ Բրիտանիայի դեսպանատան նախաձեռնությամբ տեղի ունեցավ բարեգործական համերգ Գյումրու Լորդ Բայրոնի անվան թիվ 20 դպրոցին օգնելու համար: Համերգից ստացված միջոցները կուղղվեն կրթօջախի ջեռուցման եւ ջրամատակարարման համակարգերի բարելավմանը Հայաստանի պետական երիտասարդական նվագախումբը բրիտանացի ջութակահար Ռաֆայել Զամբռզիսկի-Պեյնը ներկայացրեցին Չայկովսկու, Մենդելսոնի ստեղծագործությունները, Մոցարտի ջութակի թիվ 5 կոնցերտը, համերգին որպես հրավիրյալ դիրիժոր մասնակցում էր նաեւ Թոմաս Քարոլը Ծրագիրն ընտրվել էր Հայաստանի պետական երիտասարդական նվագախմբի գեղարվեստական ղեկավար եւ գլխավոր դիրիժոր Սերգեյ Սմբատյանի կողմից: Համերգին հնչեցին Պյոտր Իլյիչ Չայկովսկու իտալական կապրիչիո, օպ. 45, Վոլֆգանգ Ամադեուս Մոցարտի ջութակի կոնցերտ N 5 in Ա մաժոր: Բրիտանացի ջութակահար Ռաֆայել Զամբռզիսկի-Պեյնը լրագրողների հետ հանդիպմանն ասաց, որ երրորդ անգամ է գտնվում Հայաստանում եւ ունի մի շարք հայ ընկերներ. «Հիացած եմ Ձեր մշակույթով եւ հետաքրքրված պատմությամբ, ինչպես նաեւ շատ եմ սիրում հայկական ուտեստներ»: Երաժիշտը զարմանքով նշում է. «Հայաստանը լինելով փոքր եւ ունենալով քիչ բնակչություն` հարուստ է տաղանդաշատ երաժիշտներով»: Նշենք, որ Գյումրու Լորդ Բայրոնի անվան թիվ 20 դպրոցը կառուցվել է 1988թ. ավերիչ երկրաշարժից հետո Միացյալ Թագավորության կողմից: Դպրոցի բացման արարողությանը 1990թ. հունիսի 10-ին ներկա է եղել Մեծ Բրիտանիայի վարչապետ Մարգարետ Թետչերը Իհարկե, այս համերգից ստացված հասույթը չի բավականացնի դպրոցի ջեռուցման եւ ջրամատակարարման համակարգերի բարելավմանը, սակայն ինչ-որ չափով կօգնի: Ի դեպ, մի շարք բարերարներ եւս միացել են այս ծրագրին եւ իրենց աջակցությունը կցուցաբերեն: Վերականգման համար անհրաժեշտ գումարը կազմում է 25 000 ֆունտ ստեռլինգ: Ջութակահար Ռաֆայել Զամբռզիսկի-Պեյնը նաեւ ընդգծում է, որ հայկական մշակույթը ներկայացման կարիք չունի, քանի որ հայերն ունեն այնպիսի երաժիշտներ, ինչպիսիք են` Արամ Խաչատրյանը, Ալեքսանդր Հարությունյանը, Առնո Բաբաջանյանը եւ այլք: | 
