ԱՐՈՆՅԱՆԸ ԲԱԺԱՆԵՑ 4-6-ՐԴ ՏԵՂԵՐԸ Նորվեգիայի Ստավանգեր քաղաքում ավարտվեց շախմատի գերմրցաշարը, որն առաջին անգամ էր անցկացվում: Լեւոն Արոնյանն ավարտական տուրում մրցում էր Մագնուս Կառլսենի հետ, որը նախորդ տուրում պարտվել էր Վան Հաոյին եւ զգալիորեն բարդացրել էր 1-ին մրցանակը շահելու իր խնդիրը: 30-րդ քայլին մրցակիցները խաղաղ դաշն կնքեցին: Լեւոն Արոնյանը վաստակած 5 միավորով Վիշվանաթան Անանդի եւ Պյոտր Սվիդլերի հետ բաժանեց 4-6-րդ տեղերը: Մրցաշարի հաղթող դարձավ ռուսաստանցի գրոսմայստեր Սերգեյ Կարյակինը, որն ավարտական տուրում հաշտություն կնքեց Վեսելին Թոփալովի հետ: Կարյակինը վաստակեց 6 միավոր: Նրանից կես միավորով հետ մնացին Մագնուս Կառլսենն ու Հիկարու Նակամուրան: 4,5 միավորով 7-րդ տեղը գրավեց Վան Հաոն, որը պարտության մատնեց նաեւ աշխարհի չեմպիոն Վիշվանաթան Անանդին: Նա պարտության էր մատնել նաեւ Պյոտր Սվիդլերին, իսկ Արոնյանի հետ հաշտություն էր կնքել: Իսկ ահա ավելի թույլ մրցակիցների հետ չինացի շախմատիստը թույլ խաղաց: Մասնավորապես նա պարտվեց մրցաշարի բացահայտ հետնապահ Յոն Լյուդվիգ Համերին, որը 1,5 միավորով եզրափակեց աղյուսակը: Ավարտական տուրում էլ Համերը զիջեց Հիկարու Նակամուրային: 4 միավորով 8-րդ տեղը զբաղեցրեց Վեսելին Թոփալովը: Իր հնարավորություններից թույլ հանդես եկավ Թեյմուր Ռաջաբովը, որը հաշտություն կնքելով Պյոտր Սվիդլերի հետ, 3 միավորով զբաղեցրեց նախավերջինՙ 9-րդ հորիզոնականը: Հունիսի 12-ին Մոսկվայում կմեկնարկի Միխայիլ Տալի հուշամրցաշարը, որին Լեւոն Արոնյանը չի մասնակցի: | 
