ՄՇԱԿՈՒՅԹԻ ԿԱՐՈՏ ՍԱՀՄԱՆԱՄԵՐՁ ԳՅՈՒՂԵՐՈՒՄ Ի. Պ. Հայաստանի ու Արցախի սահմանամերձ գյուղերը մշակութային կյանքին հաղորդակից դարձնելու նպատակով ԱԺ պատգամավոր, երգչուհի Շուշան Պետրոսյանը ձեռնամուխ է եղել է այդ գյուղերում իրականացնելու մշակութային մի շարք միջոցառումներ ու ծրագրեր: Երեկ «Նոյյան տապան» ակումբումՙ ասուլիսի ժամանակ երգչուհին պատմեց, որ նախաձեռնության գաղափարը հղացել է Մարտակերտի մշակույթի տանը, որտեղ չնայած շենքային նորոգված պայմաններին` ներսում մշակութային որեւէ խմբակ չի գործել: Երգչուհին ասում է` դրանից հետո, գործի դնելով մշակույթի այն լծակները, որոնք իսկապես ուժեղ են, վերաբացել է մշակույթի տան 5 խմբակ: Խմբակների վերաբացմանը հաջորդել են դպրոցներում կազմակերպվող ցուցահանդեսները: Ապա «Փյունիկ» հիմնադրամի օգնությամբ վերաբացել է Հադրութի ու Մատաղիսի դպրոցների քիմիայի, կենսաբանության ու ֆիզիկայի դասասենյակները, Մալյան թատրոնը հանդես է եկել ներկայացումներով Մարտակերտում եւ Թալիշում: Շուշան Պետրոսյանը նշում է` եթե տեսնեք մարդկանց ուրախությունը, ապա կհասկանաք, թե այնտեղ մարդիկ որքան կարոտ են մշակույթի: Ի դեպ, Շուշան Պետրոսյանի ծրագրերը հատվել են Լրատվամիջոցների համահայկական ընկերակցության եւ «Թալիշի պաշտպան» ՀԿ-ի համատեղ ծրագրին, որի իմաստն այն է, որ Արցախի սահմանամերձ Թալիշ գյուղի համար կատարվի բարեգործական ակցիա, որպեսզի գյուղն ունենա որակյալ ինտերնետ կապ: Իսկ դպրոցին ու մի քանի հասարակական կազմակերպությունների ինտերնետ կապը կտրամադրվի անվճար: Ներկայումս ծրագիրն ընթացքի մեջ է, եւ դրա իրագործան համար կազմակերպվել է դրամահավաք: Բնականաբար, ինտերնետի մուտքը Թալիշ ծնունդ կտա ուրիշ նոր ծրագրերի ու նախաձեռնությունների, եւ կակտիվացնի արտաքին աշխարհի հետ բնակիչների կապը: Երգչուհի Շուշան Պետրսյանը, ամփոփելով թեման եւ անդրադառնալով Թալիշ գյուղը որակյալ ինտերնետով ապահովելու ծրագրին, եզրակացնում է` նմանօրինակ նախաձեռնությունները կյանքի կոչելու համար ընդամենը ցանկություն է պետք: Երգչուհին հավելում է. «Ես շատ ուրախ եմ, որ Ազգային Ժողովի պատգամավոր եմ եւ կարող եմ ծառայեցնել դա մշակույթին»: | 
