ԵՐԵՎԱՆԻ ՊԵՏԱԿԱՆ ՀԱՄԱԼՍԱՐԱՆՈՒՄ 2013-2014 ուստարում մայր բուհում կսովորի 3414 առաջին կուրսեցի, որոնցից 408-ըՙ անվճար, 3006-ըՙ վճարովի համակարգով: Այս տարի ուսումնական տարին կմեկնարկի սեպտեմբերի 2-ին: Երեւանի պետական համալսարանում առաջին կուրսեցիներին ֆակուլտետների դեկանները, պրոֆեսորադասախոսական կազմի, ուսանողական կառույցների ներկայացուցիչները կդիմավորեն ֆակուլտետի դահլիճներում եւ լսարաններում: Ռոմանագերմանական բանասիրության եւ սոցիոլոգիայի ֆակուլտետների ուսանողները կհաճախեն 2-րդ հերթով, իսկ մյուս բոլոր ֆակուլտետներում դասերը կմեկնարկեն 1-ին հերթով: 1-ին հերթի դասերը սկսվում են ժամը 09:30-ին, իսկ 2-րդ հերթինըՙ 14:30-ին: Ժամանակացույցի վերաբերյալ առավել մանրամասն տեղեկատվություն կարելի է ստանալ ԵՊՀ պաշտոնական կայքիՙ www.ysu.am-ի նորությունների բաժնում: «Ազգ»-ը երեկ գրել էր ԵՊՀ-ում դասախոսների նոր հավելավճարների մասինՙ ըստ կարգերի, վերապահություն հայտնելով այդ կարգերի ընկալման վերաբերյալ: Երեկ ԵՊՀ մամուլի գրասենյակից հայտնեցին, որ անտեղի են մեր այդ մտահոգությունները, քանզի ցարդ որեւէ նախադեպ չկա «կարգային» դժգոհության: Մաղթենք, որ մեր մտահոգությունն անհիմն լինի: | 
