ԱԼ. ՍՊԵՆԴԻԱՐՅԱՆԻ ՏՈՒՆ-ԹԱՆԳԱՐԱՆԸ` «ԵՎՐՈՊԱԿԱՆ ԺԱՌԱՆԳՈՒԹՅԱՆ ՕՐԵՐԻՆ» Ալ. Սպենդիարյանի տուն-թանգարանում օգոստոսի 31-ից սեպտեմբերի 1-ը կբացվի ցուցահանդես, որտեղ ներկայացված կլինեն թանգարանի արխիվում պահվող նոտաների անվանաթերթերի եւ ազդագրերի լավագույն նմուշները: Այս մասին «Արմենպրես»-ին հայտնում են տուն-թանգարանից: Ցուցահանդեսը կգործի «Եվրոպական ժառանգության օրերի» շրջանակում: Ցուցադրված նմուշներից շատերը հրատարակված են համաշխարհային տպագրական մշակույթի մեջ մեծ դեր խաղացած հրատարակչատների կողմից` ներկայացնելով 19-րդ դարավերջի եւ 20-րդ դարասկզբի տպագրական մշակույթի նվաճումները: Առանձնանում են Մ. Բելյաեւի (Լայպցիգ), Պ. Յուրգենսոնի (Մոսկվա), Վ. Բեսսելի (Մոսկվա - Ս.Պետերբուրգ), Ա. Գուտխեյլի (Մոսկվա) եւ Մ. Բեռնարդի (Ս. Պետերբուրգ) երաժշտական հրատարակչատներում լույս տեսած նոտաները: Այդ հրատարակչություններից մի քանիսը շարունակում են իրենց գործունեությունը մինչ օրս: Այս տպագրատներում հրատարակվել են Բախի, Բեթհովենի, Սեն-Սանսի, Չայկովսկու, Գլինկայի, Գլազունովի, Սպենդիարյանի եւ այլոց գործերը: Ցուցադրության գաղափարի եւ ձեւավորման հեղինակն է երիտասարդ նկարիչ-դիզայներ Լիլիթ Արշակյանը: Ցուցահանդեսը կբացվի օգոստոսի 31-ին, տուն-թանգարանի դահլիճում: |
