ԿՈՄՊՈԶԻՏՈՐ ԽԱՉԱՏՈՒՐ ԱՎԵՏԻՍՅԱՆԻ ՍՏԵՂԾԱԳՈՐԾՈՒԹՅՈՒՆՆԵՐՆ ԱՐԴԵՆ ԺՈՂՈՎԱԾՈՒԻ ՏԵՍՔՈՎ Մ. Հ. Լույս է տեսել կոմպոզիտոր «Խաչատուր Ավետիսյանի երգերը» ժողովածուն, որտեղ տեղ են գտել նրա բոլոր ստեղծագործությունները: Կոմպոզիտոր Խաչատուր Ավետիսյանի որդին` Միքայել Ավետիսյանը, երեկ լրագրողներին տեղեկացրեց, որ 55 երգ է տեղ գտել այդ ժողովածուում: Գիրքը լույս է տեսել լիբանանահայ բարերար Հարություն Խաչատրյանի օժանդակության շնորհիվ, եւ տպագրվել` ԱՄՆ-ի Լոս Անջելես քաղաքում: Ի դեպ` սեպեմբերի 17-ին Արամ Խաչատրյան մեծ համերգասրահում կկայանա համերգ, որի ընթացքում կհնչեն Խաչատուր Ավետիսյանի եւ Լյուդվիգ Դուրյանի լավագույն ստեղծագործությունները` «Կռունկներ», «Եղեգ», «Սիրուն գիշեր», «Վայ լե-լե-լե», «Որտեղ գտնեմ քեզ» եւ այլ սիրված ու հիթային ստեղծագործություններ: Ինչպես տեղեկացրեց Միքայել Ավետիսյանը, առաջիկայում նախատեսում է լույս ընծայել նաեւ կոմպոզիտորի կտավների ժողովածուն, ինչպես նաեւ քանոնի համար գրած ստեղծագործությունները. «Եղեռնի 100-ամյակի կապակցությամբ 80-ական թվականներին գրել է «Օրատորիա» անվամբ ստեղծագործություն, որն աժմ արդեն ձայնագրվել է: Այս ստեղծագործությունը կատարվել է աշխարհի գրեթե բոլոր լեզուներով, բայց ոչ հայերենով: Այն հնչել է Բելիգիայում, Շվեյցարիայում, Մալազիայում, Հոլանդիայում եւ այլ երկրներում: Շատ գեղեցիկ ստեղծագործություն է, որն առաջին անգամ կհնչի Եղեռնի 100-րդ տարելիցի կապակցությամբ»: |
