ԲՈՏԻ ԴԵՄԵԼԸ ԿԽԱՂԱ «ՇԻՐԱԿՈՒՄ» Հայաստանի չեմպիոն Գյումրիի «Շիրակը» կես տարվա պայմանագիր է կնքել կոտդիվուարցի հարձակվող Բոտի Դեմելի հետ, որն արդեն միացել է շիրակցիներին: Սպասվում է, որ նա «Շիրակում» նորամուտը կնշի սեպտեմբերի 14-ին «Արարատի» հետ կայանալիք առաջնության խաղում: Նախորդ մրցաշրջանում Բոտի Դեմելը հանդես է եկել վրացական «Զեստաֆոնի» կազմում: Բոտի Դեմելին լավ են ճանաչում հայ ֆուտբոլասերները, քանի որ նա ժամանակին հանդես է եկել «Միկայում»ՙ աչքի ընկնելով արդյունավետ խաղով: Նա «Միկայում» 26 գոլի հեղինակ է դարձել: 2011-ի փետրվարին Դեմելը քառամյա պայմանագիր կնքեց Նորվեգիայի բազմակի չեմպիոն «Ռուսենբորգի» հետ, սակայն ծանր վնասվածք ստացավ եւ 8 ամիս խաղադաշտ դուրս չեկավ: Հաջորդ տարի Դեմելը խզեց պայմանագիրը «Ռուսենբորգի» հետ ու վերադարձավ «Միկա», որի կազմում անցկացրած 8 հանդիպումներում 3 գոլ խփեց: Սակայն վնասվածքից լրիվ չապաքինվելով, անցած տարվա ամռանը կոտդիվուարցի ֆուտբոլիստը կրկին հեռացավ «Միկայից»: | 
