ՊԱՐԱԼԼԵԼՍ ՖԻԼՄ ԿԻՆՈԸՆԿԵՐՈՒԹՅԱՆ ՆՈՐՈՒԹՅՈՒՆՆԵՐԸ ՄԱՆԱՆԱ ՀՈՎԱԿԻՄՅԱՆ Հոկտեմբերի 4-ին Մոսկվա կինոթատրոնում Պարալլելս ֆիլմ (Parallels Film) անկախ կինոընկերությունը հանրությանը կներկայացնի Մարինե Զաքարյանի հեղինակած «Փասիանի որսորդը» ֆիլմը: Պարալլելս ֆիլմ կինոընկերությունը 2012թ.-ից սկսել է նորահայտ կինեմատոգրաֆիստների առաջին ֆիլմերի աջակցության ծրագիրը` ջանալով օժանդակել հայկական կինոարվեստի նոր ալիքի բացահայտմանը: Ռեժիսոր Մարինե Զաքարյանի «Փասիանի որսորդը»-ն այդ ծրագրի առաջին ֆիլմն է: Կինոնախագիծը մտահղացվել եւ իրականացվում է Վիլյամ Սարոյանի ծննդյան 105-ամյակի առթիվ եւ արժանացել է «Հայակ» ազգային կինոյի «Լավագույն դեբյուտ 2013» մրցանակի: Այս դրամատիկ կատակերգությունը Վիլյամ Սարոյանի պատմվածքների հիման վրա նկարահանվող «Կիսալուսնի ծովածոցը»-ը լիամետրաժ խաղարկային ֆիլմի «Աշուն» հատվածն է: Համադրելով Հայաստանի ֆիլմարտադրության դաշտում ունեցած փորձը եւ միջազգային կինոարտադրության մեջ զգալի դերակատարում ունեցող կառույցների հետ համատեղ աշխատանքային փորձառությունը Պարալլելս ֆիլմը զարգացնում է իր նախագծերը արտադրության նախապատրաստումից մինչեւ դրանց ներկայացում միջազգային փառատոներում եւ շուկաներում: Կինոընկերությունը նախատեսում է մոտ ապագայում ավարտին հասցնել երկու լիամետրաժ ֆիլմ «Կիսալուսնի ծովածոցը»-ը (2014) եւ «Լուսավոր շրջան»-ը (2015): «Ուրախ ենք հայ հանրությանը ներկայացնել «Փասիանի որսորդը» ֆիլմը եւ սպասում ենք արձագանքների: Միջազգային գործընկերների հետ ներկայումս աշխատում ենք նաեւ ռեժիսորներ Մարինե Զաքարյանի «Կիսալուսնի ծովածոցը» եւ Հովհաննես Գալստյանի «Լուսավոր շրջան» լիամետրաժ միջազգային ֆիլմերի արտադրության վրա: «Լուսավոր շրջան»-ը միջազգային ֆիլմ է: Այս ֆիլմի կայացման համար համատեղել ենք թե՛ Հայաստանի, թե՛ արտասահմանյան գործընկերների ջանքերն ու ներդրումները»,- նշեց Պարալլելս ֆիլմ կինոընկերության հիմնադիր-տնօրեն Հովհաննես Գալստյանը: «Լուսավոր շրջան» նախագծի առաջին հրապարակային ներկայացումը կայացել է 2012թ-ին Կաննի փառատոնին եւ Եվրոպական կինոյի մի շարք այլ հարթակներում: Նախագծի հեղինակները, Հայաստանի եւ արտասահմանի պրոդյուսերները լիահույս են, որ իր յուրահատուկ թեմատիկայով, նկարահանման տեխնիկայով եւ մտահղացմամբ այս ֆիլմն իր կարեւոր տեղը կգրավի կինոաշխարհում: «Լուսավոր շրջան»-ի նկարահանումներն սկսվելու են 2013-ի նոյեմբերին: Նախատեսվում է, որ ֆիլմը էկրան կբարձրանա 2015-ի ամռանը: Ընթացքի մեջ են անհրաժեշտ 1.1 միլիոն եվրո ներդրումը ձեռքբերելու աշխատանքները ֆիլմը նախատեսված ժամանակին ավարտելու եւ կինոսեր հանրությանը ներկայացնելու համար: | 
