ՋԱՎԱԽՔՈՒՄ ԳՈՐԾՈՒՄ Է ՀԱՅԿԱԿԱՆ ԼՐԱՏՎԱՄԻՋՈՑ Մարտի 5-ից Ջավախքում սկսեց գործել «Ջավախք նյուսի» (jnews.ge) հայերեն տարբերակը. երեք ամիս տեւած փորձնական եւ նախապատրաստական աշխատանքներից հետո «Բաց սահմաններ» հասարակական կազմակերպությունը թողարկեց մեսրոպատառ լրատվամիջոց Ջավախքում: «Բաց սահմաններ» հասարակական կազմակերպությունը ստեղծվեց անցյալ տարի փետրվար ամսին: Հիմնադիրները հենց ջավախքցի լրագրողներն են: Կազմակերպության ստեղծման առաջնային նպատակներից էր Ջավախքն առանց լրատվամիջոցի չթողնել: Հիմնական միտքն էր ունենալ հայալեզու եւ վրացալեզու լրատվամիջոց: Սակայն սկզբի համար ստացվեց հայալեզու եւ ռուսալեզու, քանի որ ռուսալեզու տարբերակը ապահովում են հենց խմբագրության աշխատակիցները, իսկ վրացերեն լեզվի համար հարկավոր է աշխատավարձով թարգմանիչ: Սակայն լրատվամիջոցի ապագա ծրագրերի մեջ է մտնում նաեւ վրացերեն տարբերակի գործարկումը: Ջավախքի լրատվական կենտրոնըՙ jnews.ge-ն ստեղծվեց ամերիկական NED (Ազգային աջակցություն ժողովրդավարությանը) հիմնադրամի եւ չեխական NESEHNUTI կազմակերպության ֆինանսական եւ տեխնիկական աջակցությամբ: «Ջավախք նյուսը» քաղաքական-հասարակական մի լրատվամիջոց է, որը ճշգրիտ եւ համաչափ ինֆորմացիա է տարածում Ջավախքից, ինչպես ջավախցիների, այնպես էլ ամբողջ աշխարհի համար: «Ջավախք նյուսի» առաքելություններից է Վրաստանում ընթերցողներին տեղեկացնել Ջավախքում տիրող իրականության մասին: «Ջավախք նյուսի» խմբագրությունը բաղկացած է հինգ աշխատակիցներիցՙ խմբագիր, մենեջեր եւ երեք լրագրող: Ունենք նաեւ մեկ թղթակիցՙ Նինոծմինդայում: | 
