ՎԻՎԱՍԵԼ-ՄՏՍ-Ն ՈՒ ՀՀ ՈՍՏԻԿԱՆՈՒԹՅՈՒՆՆ ԻՐԱԿԱՆԱՑՆՈՒՄ ԵՆ ԵՐԵԽԱՆԵՐԻ ՇՐՋԱՆՈՒՄ ԵՐԹԵՎԵԿՈՒԹՅԱՆ ԿԱՆՈՆՆԵՐԻ ՈՒՍՈՒՑՄԱՆՆ ՈՒՂՂՎԱԾ ԾՐԱԳԻՐ Երեխաների անվտանգության ապահովումը մշտապես ՀՀ ոստիկանության ուշադրության կենտրոնում է եւ իրականացվող քաղաքականության առանցքային ուղղություններից մեկը: Առանձնակի կարեւորվում է երթեւեկության անվտանգությունը, որի հիմքում դրված է երեխաների շրջանում այդ կանոններին անվերապահորեն հետեւելու գիտակցության սերմանումը, օրինապաշտ քաղաքացու դաստիարակությունը: Այդ խնդրի լուծմանն են ուղղված դպրոցներում պարբերաբար իրականացվող հանդիպում-զրույցները, դեռահասների այցելությունները ճանապարհային ոստիկանության ստորաբաժանումներ, սերտ համագործակցությունը կրթական ոլորտի պատասխանատուների եւ ծնողների հետ: Ոստիկանությունը համոզված է, որ երեխայի հետ աշխատանքը պետք է սկսել վաղՙ տարրական դասարանների եւ նույնիսկ նախադպրոցական տարիքից: Այս ռազմավարության իրականացման առաջին քայլերից է «Փոքրիկ ոստիկան» ուսուցողական խաղ-ձեռնարկի ստեղծումը, որի հասցեատերն առաջին դասարանցիներն են: Ձեռնարկը երեխաներին կօգնի ինքնուրույն յուրացնել երթեւեկության կանոնները, ճանաչել ճանապարհային նշանները եւ կնախազգուշացնի արտակարգ իրավիճակների մասին: Հաշվի առնելով, որ խոշոր քաղաքներում երթեւեկությունը բավականին լարված էՙ մարտի 31-ին խաղ-ձեռնարկն առաջինը տրամադրվել է մայրաքաղաքի 426 առաջին դասարաններին: Որպես երեխաների շրջանում կրթական եւ իրազեկման բազմաթիվ ծրագրեր իրականացնող սոցիալապես պատասխանատու ընկերություն, ՎիվաՍել-ՄՏՍ-ն աջակցել է ՀՀ ոստիկանության նախագծինՙ 14 միլիոն դրամ հատկացնելով «Փոքրիկ ոստիկան» ուսուցողական խաղ-ձեռնարկի 1000 օրինակ հրատարակելու նպատակով: Նախագծի մեկնարկի ժամկետը պայմանավորված է նաեւ դպրոցական առաջիկա ամառային արձակուրդներով. դրսում ավելի շատ ժամանակ անցկացնող երեխաները պետք է տիրապետեն երթեւեկության կանոնների վերաբերյալ անհրաժեշտ գիտելիքների: | 
