ԿՈՏԱՅՔԻ ՆՈՐ ՄԱՐԶՊԵՏԸՙ ԳԱԳԻԿ ԾԱՌՈՒԿՅԱՆԻ ՓԵՍԱՆ Ա. Մ. Կառավարության երեկվա որոշմամբ Արամ Հարությունյանը ազատվեց Կոտայքի մարզպետի պաշտոնից այլ աշխատանքի անցնելու կապակցությամբ: Մասնավորապես որպես այլ վայր հիշատակվում է գյուղնախարարության ջրային տնտեսության կոմիտեն: Նրա փոխարեն այդ պաշտոնում նշանակվեց Կարապետ Գուլոյանը` Աբովյանի ներկայիս քաղաքապետը, ինչպես նաեւ Գագիկ Ծառուկյանի փեսան: Շահութահարկի արտոնություններ արտահանողներին Կառավարության նիստում, երեկ, շահութահարկի արտոնություն է սահմանվել հարկ վճարողների այն խմբի համար, որի Հայաստանի Հանրապետության տարածքից դուրս կատարած աշխատանքի հանրագումարը առնվազն 40 մլրդ դրամ է: Այս դեպքում շահութահարկի դրույքաչափը 5 տոկոս է: 2 տոկոս դրույքաչափ է սահմանվել հարկ վճարողների այն խմբի համար, որի ՀՀ տարածքից դուրս կատարած աշխատանքի արժեքի հանրագումարը առնվազն 50 մլրդ դրամ է: Թվային հեռարձակումը հնարավոր է հետաձգվի Հուլիսի 1-ից ՀՀ ամբողջ տարածքում հեռուստահաղորդումների թվային հեռարձակման անցնելը հնարավոր է հետաձգվի: Կառավարությունը չի առարկել պատգամավոր Էդմոն Մարությանի առաջարկությանը` հեռարձակումը հետաձգել մինչեւ 2017 թվականը: Սակայն, ըստ տրանսպորտի եւ կապի նախարար Գագիկ Բեգլարյանի, դեռեւս քննարկման ենթակա են ծագող ֆինանսական հարցերը, ինչպես նաեւ հետաձգման ժամկետները: Ապրիլի 6-ի աշխատանքային օրը կտեղափոխվի ապրիլի 11-ը Ապրիլի 6-ի աշխատանքային օրը կառավարության որոշմամբ կտեղափոխվի ապրիլի 11-ըՙ շաբաթ օրը: Այս մասին երեկ որոշում ընդունեց կառավարությունը: Միաժամանակ, Հայ Առաքելական եկեղեցու Տաղավար տոներին հաջորդող մեռելոց օրերը ոչ աշխատանքային հայտարարելու հարցը վարչապետ Հովիկ Աբրահամյանի հանձնարարությամբ լրացուցիչ կքննարկվի Մայր աթոռ Սուրբ Էջմիածնի, պետական եւ հասարակական կազմակերպությունների ներկայացուցիչների մասնակցությամբ: Նիստին ներկա Հայ Առաքելական եկեղեցու ներկայացուցիչները համաձայն էին հարցի լրացուցիչ քննարկումներին: | 
