ՆԱՐԵԿԱՑԻ ԱՐՎԵՍՏԻ ՄԻՈՒԹՅՈՒՆՈՒՄ ՑՈՒՑԱԴՐՎԵՑ «ԱՐԱՐԱՏԻՑ ՍԻՈՆ» ՓԱՍՏԱ-ՎԱՎԵՐԱԳՐԱԿԱՆ ՖԻԼՄԸ ԳԱՐԻԿ ԱՎԵՏԻՍՅԱՆ Ապրիլի 1-ին նախազատկական կինոչորեքշաբթին ներկայացրեց կինոռեժիսոր Էդգար Բաղդասարյանի «Արարատից Սիոն» ֆիլմը: Բացման ու ողջույնի խոսքով հանդես եկավ Նարեկացի Արվեստի միության հանրային կապերի պատասխանատու Արմեն Բաղդասարյանը, որ հակիրճ ներկայացրեց միջոցառման նպատակն ու հյուրերին: Այնուհետեւ ելույթ ունեցավ ֆիլմի ռեժիսոր Էդգար Բաղդասարյանը, որ հակիրճ ներկայացրեց ֆիլմի ստեղծման պատմությունն ու սյուժեն, նշելով, որ այն դիտել են շուրջ 75 միլիոն մարդ ամբողջ աշխարհում ու որ նա արժանացել է անգլիական ֆիլմարտադրության երկու պատվավոր մրցանակների: Վերջում ելույթ ունեցավ Տեր Արսեն Քահանան, ով խոսեց Զատկի տոնի խորհրդի ու նշանակության մասին, իր տերունական աղոթքն ու օրհնությունը հղելով բոլորին: Վավերագրական ֆիլմը ստեղծողները ներկայացնում են այս պատմությունների մի շարք կարեւոր էջեր` բացահայտելով սեփական ինքնության թանկարժեք հայեցակետեր: Նրանք անցնում են հայ ուխտավորների ուղիներով, որոնք ընկած են երկու պատմական կիզակետերի միջեւՙ Արարատից Սիոն: «Արարատից Սիոն» փաստավավերագրական ֆիլմը պատմում է, թե ինչպես են հայերը հայտնվել Սուրբ հողում` Երուսաղեմում, ինչպես են հաստատվել այնտեղ, ձեռք բերել հոգեւորական որոշակի իրավունքներ, դիրք, տարածքներ, շինություններ: Ֆիլմի հեղինակների խոսքով, շարժանկարը հայի ինքնության մասին է: Ֆիլմում հենց այդպես էլ ասվում է, որ ազգին ճանաչելու, ազգի ինքնությունը պարզելու համար պետք է հետեւել նրա ուխտագնացությանը: «Արարատից Սիոն» ֆիլմի հեղինակներն ասում են, որ փորձել են ներկայացնել հենց հայերի ուխտագնացության պատմությունըՙ հային ներկայացնելու համար: Ֆիլմը ռեժիսորա-օպերատորական տեսանկյունից բավականաչափ հաջողված է, կատարված են բավական հարուստ նկարահանումներ, դիտարժան նկարահանումներ: Պատկերի առումով ինչ-որ պահ առաջանում է որոշակի ձանձրույթ, քանի որ խաղարկային տեսարանները շատ քիչ են, քիչ են հարցազրույցները, դինամիկան երբեմն պակասում է: Բայց դա երեւի թե ճաշակի եւ անձնական տպավորության հարց է: | 
