ԱՐԱ ԳԵՎՈՐԳՅԱՆ. «REMEMBER» ԵՎ «ԿԱՆՔ ՈՒ ԿԼԻՆԵՆՔ» ՏԵՍԱՀՈԼՈՎԱԿՆԵՐՈՒՄ ԱՄԲՈՂՋ ԱՇԽԱՐՀԸ ԵՐԳՈՒՄ Է ՀԱՅՈՑ ՑԵՂԱՍՊԱՆՈՒԹՅԱՆ ՄԱՍԻՆ» ՄԱՆԱՆԱ ՀՈՎԱԿԻՄՅԱՆ Օրերս տեղի ունեցավ ՀՀ վաստակավոր արտիստ Արա Գեւորգյանի եւ New arena production)ը համատեղ ջանքերով ստեղծված «Սեւ ապրիլ» նախագծի առաջին` «Remember» եւ «Կանք ու կլինենք» տեսահոլովակների պրեմիերան: Ցեղասպանության 100)րդ տարելիցին նվիրված երգի անգլերեն տեքստի հեղինակն է ամերիկացի երգիչ Դանիել Դեքերը, իսկ հայերենինը` Լեւոն Բլբուլյանը: Երկլեզու տեսահոլովակների ռեժիսորը Վահան Սեթոյանն է: Երգի հայերեն տեսահոլովակում որպես դիրիժոր հանդես է գալիս Հայաստանի ազգային ֆիլհարմոնիկ նվագախմբի գեղարվեստական ղեկավար եւ գլխավոր դիրիժոր Էդուարդ Թոփչյանը, իսկ անգլերեն տարբերակում` Հայաստանի ազգային ակադեմիական երգչախմբի գեղարվեստական ղեկավար եւ գլխավոր դիրիժոր Հովհաննես Չեքիջյանը: Մաեստրո Հովհաննես Չեքիջյանը նախաձեռնությունը հաջողված է համարում. «Առաջին անգամ, երբ լսեցի ստեղծագործությունը, ինձ շատ դուր եկավ: Արա Գեւորգյանը շնորհքով տղա է: Երբ լսեցիՙ ասացի, որ չի գտնվի մեկը, որը չհավանի այս երաժշտությունը: Ընթացքը շատ սահուն անցավ: Սա մատչելի երաժշտություն է բոլոր ազգերի համար»: «Ազգի» հետ զրույցում Արա Գեւորգյանը նշեց, որ իր համար շատ կարեւոր է մաեստրո Հովհաննես Չեքիջյանի կարծիքը երգի մասին, իսկ նա տվել էր իր հավանությունը, որից հետո էլ որոշել է տեսահոլովակ նկարահանել. «Մասնակցում են աշխարհի տարբեր երկրների երգչախմբեր, որոնց մի մասը մասնակցում էին նաեւ «Իմ Հայաստան» փառատոնին: Նկարահանումները տեղի ունեցան ինչպես Հայաստանում, այնպես էլ աշխարհի տարբեր երկրներումՙ Չիլիում, Բուենոս Այրեսում, Մոնրեալում, Փարիզում, Մոսկվայում, Թբիլիսիում եւ այլուր: Վերոնշյալ վայրերի երգչախմբերը նկարահանվեցին իրենց բնակավայրերում, եւ այդ տեսագրությունները ներառեցինք տեսահոլովակում, ստացվեց, որ «Remember» եւ «Կանք ու կլինենք» տեսահոլովակներում ամբողջ աշխարհը երգում է Հայոց ցեղասպանության մասին»: Ա. Գեւորգյանն ավելացրեց, որ տեսահոլովակի վրա համարյա գումար չի ծախսվել, բոլոր մասնակիցները սիրահոժար են միացել աշխատանքին, որն էլ ցույց է տալիս, որ եթե միասնական դառնանք, լավ արդյունքի կարող ենք հասնել: Հարցին, թե ինչպե՞ս կգնահատի Ցեղասպանության 100-րդ տարելիցին նվիրված միջոցառումների շարքը, Ա. Գեւորգյանը պատասխանեց. «Ոչ բավարար, քանի որ կարծես թե ցեղասպանությունը մենք հիշում ենք միայն ապրիլի 24-ինՙ բոլոր միջոցառումները տեղի են ունենում այդ օրերին»,- եւ ավելացրեց. «Աշխարհի հետ պետք է խոսել իրենց լեզվով, ամեն օր: Մշակույթը ամենահզոր միջոցն է աշխարհով մեկ տարածելու եւ հանրայնացնելու քո ցավը, ինչպես նաեւ ճանաչում պահանջելու: Իսկ մենք այդպես էլ այդ հզոր գործիքը ճիշտ չօգտագործեցինք»: | 
