ԴԱՇՆԱԿՑՈՒԹՅԱՆ ԿԱՐԾԻՔ(ՆԵՐ)Ը ՀՈՎԻԿ ԱՖՅԱՆ Չորեքշբաթի օրը Աժ-ի արտահերթ նիստի օրակարգում հակակոռուպցիոն պայքարի վերաբերյալ հարցերն էին: Կառավարությունն ու Արփինե Հովհաննիսյանը ներկայացրել էին նոր օրինագիծ, որն ըստ օրինագծերի հեղինակների «ավելի ճկուն մեխանիզմ է ձեւավորելու կոռուպցիայի դեմ պայքարում»: Հարցի շուրջ ելույթ ունեցած ՀՅԴ խմբակցության շատ երիտասարդ անդամ Անդրանիկ Կարապետյանը , սակայն, այլ կարծիք ունի: ԱԺ-ի ամբիոնից պատգամավոր Անդրանիկ Կարապետյանն իր անդրանիկ ելույթն է ունեցել եւ հայտարարել է, որ այս օրինագիծը «հարիր չէ հայուն», քանի որ «եվրոպական արժեհամակարգի վրա հիմնված է, եւ մեզՙ հայերիս, դարձնելու է «գործ տվող»: «Այսօր մենք հայ ենք, բոլորս հայ ենք...», հայտարարել է պատգամավորըՙ առանց մանրամասնելու, թե բա երեկ, կամ օրինակ 100 տարի առաջ ի՞նչ էինք: Պատգամավորի խոսքով այս օրինագիծը ստեղծելու է «գործ տվողի ինստիտուտ», քանի որ, «առաջարկում է միեւնույն վայրում աշխատողներին, հարաբերությունների մեջ մտնելիս, ուշադիր լինել միմյանց նկատմամբ», իսկ նման բանը, ըստ Կարապետյանի, մեր երկրին հարիր չէ, քանի որ մենք այսօր, ինչպես նշել է պարոն Անդրանիկը, «հայապահպանության խնդիր ունենք»: Ուշագրավ է, որ ՀՅԴ խմբակցությունը, որն, ի դեպ, այս օրինագծին կողմ է, որեւէ պարզաբանող հայտարարությամբ հանդես չեկավ իր իսկ անդամի (բայց ոչ դաշնակցականի, քանի որ Կարապետյանը ՀՅԴ անդամ չէ, պատգամավոր է դարձել ՀՅԴ ռեյտինգային ցուցակով) կարծիքը կիսո՞ւմ է, թե՞ ոչ: Միայն հաջորդ օրը, ՀՅԴ Գերագույն մարմնի անդամ Սիմոն Սիմոնեանը հայտարարեց, որ «Անդրանիկ Կարապետյանի կարծիքն իր անձնականն է, իսկ խմբակցության կարծիքը ներկայացնում է խմբակցության ղեկավարը»: Պարոն Արմեն Ռուստամյանը սակայն լուռ է: |
