ՀԵԾԱՆՎՈՐԴՆԵՐՆ ԱՎԱՐՏԵՑԻՆ ՄՐՑԱՎԵՃԸ Հայաստանի խճուղային հեծանվավազքի բաց առաջնությունն անցկացվեց տարիքային 3 խմբով: Բացի հայաստանցի 65 հեծանվորդներից, պարգեւները վիճարկեցին նաեւ Վրաստանի 11 ներկայացուցիչներ: Պատանիների 10 կմ, երիտասարդների եւ մեծահասակների 25 կմ հեծանվավազքի մրցումներն անցկացվեցին Էջմիածին-Ակնալիճ մայրուղում, իսկ 60 կմ 5 շրջանով հեծանվավազքը կայացավ Արզնու օղակաձեւ խճուղում: Առաջնությունում մրցակցությունից դուրս էին ՀՀ սպորտի եւ երիտասարդության հարցերի նախարարության հանրապետական մարզադպրոցի սաները: Նրանք խաղարկված 27 մեդալներից շահեցին 23-ը: Մնացած 4 մեդալները բաժին հասան «Հայաստան» մարզական միության անդամներին: Անհատական մրցումներում խմբային կրիտերիում մրցաձեւում պատանիներից չեմպիոնի տիտղոսը նվաճեց Պավել Ստեփանյանը: Երիտասարդների մրցավեճում ուժեղագույնը Սարիբեկ Ավետիսյանն էր: Իսկ մեծահասակների մրցումներում մրցակցությունից դուրս էր 2011-ի աշխարհի երիտասարդական առաջնության արծաթե մրցանակակիր, իտալական «Գավարդո» ակումբում հանդես եկող Մհեր Մկրտչյանը: Առաջնության արդյունքներով կազմավորվեց հեծանվավազքի Հայաստանի հավաքականը, որը կնախապատրաստվի հոլանդական Ուտրեհտ քաղաքում կայանալիք Եվրոպայի պատանեկան օլիմպիական փառատոնին: | 
