ԳՅՈՒՄՐԻ. ԵՐԿԱԹՈՒՂԱՅԻՆ ՇԱՐԺԱԿԱԶՄԵՐԸ ԿՐԿԻՆ ԿՆՈՐՈԳՎԵՆ ՏԵՂՈՒՄ Գ. Մ. Գյումրու վագոնային եւ լոկոմոտիվային դեպոներում տեղադրվել են նոր, ժամանակակից սարքավորումներ, որոնք հնարավորություն կընձեռեն բեռնափոխադրումներ իրականացնող շարժակազմերի նորոգումն առաջիկայում իրականացնել տեղում: Մինչ այդ նման նորոգումները կատարվում էին Վրաստանում: Առայժմ ընթանում են նշված դեպոների նորոգման աշխատանքներ, որոնք շուտով կավարտվեն: Այս մասին Շիրակի մարզպետ Ֆելիքս Ցոլակյանի հետ տեղի ունեցած հանդիպման ժամանակ տեղեկացրել է «Հարավկովկասյան երկաթուղի» ՓԲԸ գլխավոր տնօրեն Վիկտոր Ռեբեցը: Հանդիպմանը մասնակցել է նաեւ Գյումրու քաղաքապետ Սամվել Բալասանյանը: Նշվել է, որ լուրջ ուշադրություն է նվիրվել նաեւ անվտանգության մակարդակի բարձրացմանը: Կարեւորելով կատարված աշխատանքները, Շիրակի մարզպետը հույս է հայտնել, որ երբեմնի համբավավոր երկաթուղային հանգույց Գյումրիում ոլորտը զարգացում կարձանագրի: | 
