ՏՈՆՈՒՄ ԵՆՔ` ԲԵՆՋԱՄԻՆ ԲՐԻՏՏԵՆԻ 100-ԱՄՅԱԿԸ Մ. ՀՈՎԱԿԻՄՅԱՆ Ողջ աշխարհում այժմ տոնում են Բենջամին Բրիտտենի 100-ամյակը: Բրիտանական խորհրդի հայաստանյան մասնաճյուղը միանում է կոմպոզիտորի ծննդյան տոնակատարություններին` կազմակերպելով Բենջամին Բրիտտենի 100-ամյակին նվիրված պաստառների եւ Հայաստան կատարած այցելության լուսանկարների ցուցահանդես Կոմիտասի անվան Երեւանի Պետական կոնսերվատորիայում: Բենջամին Բրիտտենը ծնվել է Լոուստոֆթում 1913 թվականի նոյեմբերի 22-ին` երաժշտության սուրբ բարեխոս Սուրբ Սեսիլիայի (Չեչիլիա) տոնին: Կոմպոզիտորի մայրն անչափ հպարտանում էր այս փաստից եւ այն համարում ճակատագրի բարեխոսություն` հույս հայտնելով, որ իր որդին Բախից, Բեթհովենից եւ Բրամսից հետո դառնալու է «Բ» տառով սկսվող ազգանունը կրող կոմպոզիտորների աստղաբույլի չորրորդ անդամը: Եվ, իսկապես, դեռ կենդանության օրոք նա հռչակվել է 20-րդ դարի լավագույն կոմպոզիտորներից մեկը: Բրիտտենը երաժշտությամբ տարվում է դեռ վաղ տարիքից: Նա պատմում էր, որ պարզապես հիացած էր կետիկների եւ գծիկների փոխկապակցմամբ եւ նրանց ներշնչած հնչյուններով: Բրիտտենի ժառանգություննն առավել խոսուն է Ալդեբուրգ քաղաքում, ուր 1948 թվականին նա համահիմնադրել է համանուն փառատոնը, իսկ այնուհետեւ մշտապես հաստատվել այդ քաղաքում: Հենց այստեղ է նա ստեղծել այնպիսի գլուխգործոցներ, ինչպիսիք են «Պատերազմի ռեքվիեմը»: 1965 թվականին Բենջամին Բրիտտենը եւ օպերային երգիչ Փիթեր Փիրսը ժամանում են Հայաստան` հանգստանալու Դիլիջանի կոմպոզիտորների միության ստեղծագործական տանը: Նրանց հետ Հայաստանում հանգստանում են նաեւ դիրիժոր, թավջութակահար Մստիսլավ Ռոստրոպովիչը իր տիկնոջ` օպերային երգչուհի Գալինա Վիշնեւսկայայի հետ: Այդ օրերին Էդվարդ Միրզոյանի ջանքերի շնորհիվ կազմակերպվեց «Հայաստանում Բրիտտենի օրեր» փառատոնը: Հայաստանում հանգստանալու օրերին Բրիտտենը Պուշկինի բանաստեղծությունների հիման վրա գրում է վոկալ շարք: Հայաստան կատարած այցելությունից հետո կոմպոզիտորը գրում է. «Հայաստանը միշտ կմնա մեր սրտում»: | 
