ԱՐԱՐԱՏ ՂՈՒԿԱՍՅԱՆԸ ՓՆՏՐՏՈՒՔՆԵՐԻ ՃԱՆԱՊԱՐՀԻՆ Օրերս Մոսկվայում լույս է տեսել Արարատ Ղուկասյանի «Փնտրտուքների ճանապարհին» բանաստեղծությունների ժողովածուն: Այն ընդգրկում է հեղինակի ավելի քան 40 բանաստեղծություններՙ նրա ստեղծագործությունների մի փոքրիկ երկաքաղ: 1000 տպաքանակով լույս տեսած ժողովածուն Ա. Ղուկասյանի առաջին գիրքն է, որը տպագրվել է Մոսկվայի «Ջավախք» միության ներկայացուցիչ Մարտիկ Գասպարյանի անմիջական հովանավորությամբ: «Փնտրտուքների ճանապարհին» ժողովածուն ծնունդ է առել բանաստեղծի մտերիմ ընկեր, գրող, լրագրող եւ բժիշկ Ալեքսանդր Սոսնովսկու բարեկամական հորդորներից: Մասնագիտությամբ պատմաբան Արարատ Ղուկասյանը ներկայումս բնակվում է Իսպանիայի Վալենսիա քաղաքում, ուր շուրջ 10 տարի առաջ հիմնադրել է «Արարատ» հայկական միությունը, կիրակնօրյա հայկական դպրոց եւ հիմնադրել «Հայրենիք» շաբաթաթերթը: Նրա ջանքերով զետեղվեց Իսպանիայում Հայոց ցեղասպանությանը նվիրված առաջին հուշարձանըՙ Ջիվան Միրզոյանի «Կենաց խաչ» հուշարձանը: Ջ. Միրզոյանը, ի դեպ, գրքի նկարների հեղինակն է: «Փնտրտուքների ճանապարհին» գրքի շնորհանդեսներ տեղի կունենան Մոսկվայում, Իսպանիայում եւ Հայաստանում, որոնց մասին նախօրոք կտեղեկացվի լրատվամիջոցներին: | 
