ԼԵՎՈՆ ԱՐՈՆՅԱՆԸ ՏԱՐԻՆ ԿԵԶՐԱՓԱԿԻ ՊԵԿԻՆՈՒՄ Լեւոն Արոնյանը կմասնակցի վաղը Չինաստանի մայրաքաղաք Պեկինում մեկնարկող համաշխարհային մտավոր խաղերի ծրագրով անցկացվելիք շախմատի մրցումներին: Մասնակիցներն իրենց հարաբերությունները կպարզեն արագ, կայծակնային եւ բասկյան համակարգով շախմատի մրցաշարերում: Դեկտեմբերի 12-ին կկայանան արագ շախմատի մրցաշարի առաջին 4 տուրերը, հաջորդ օրը տեղի կունենան ավարտական 3 տուրերի հանդիպումները: Դեկտեմբերի 14-16-ը կանցկացվի կայծակնային մրցաշարը 30 տուրով: Մրցումները կավարտվեն դեկտեմբերի 18-ին, երբ կկայանան բասկյան համակարգով մրցաշարի ավարտական 4-րդ եւ 5-րդ տուրերը: Մրցաշարին կմասնակցեն 16 շախմատիստներ: Լեւոն Արոնյանը կմրցի Սերգեյ Կարյակինի, Ալեքսանդր Գրիշչուկի, Շահրիյար Մամեդյարովի, Պերես Լեյնիեր Դոմինգուեսի, Ռուսլան Պոնոմարյովի, Թեյմուր Ռաջաբովի, Լե Քուան Լիեմի, Վան Հաոյի, Վան Յուեի, Յան Նեպոմնյաշչու, Մաքսիմ Վաշիե-Լագրավի, Գատա Կամսկու, Պետեր Լեկոյի, Վասիլի Իվանչուկի եւ Անիշ Գիրիի հետ: |
