Տեղադրվել է` 2014-09-05 16:57:28 (GMT +04:00)

Ընթերցված է` 2663, Տպվել է` 18, Ուղարկվել է էլ.փոստով` 10

ՄԱԿ-Ը ԿՔՆՆԻ ՋԻՀԱԴԻՍՏՆԵՐԻ ՀԱՆՑԱԳՈՐԾՈՒԹՅՈՒՆՆԵՐԸ

Պ. Ք.

ՄԱԿ-ի Մարդու իրավունքների խորհուրդը որոշել է Իրաք գործուղել հանձնաժողով, որը կքննի «Իսլամական պետության» ջիհադիստների ոճրագործությունները: Նախաձեռնությանը հավանություն են տվել միջազգային կազմակերպության բոլոր 47 անդամները:

Հատուկ նիստն անցկացվել է Իրաքի պատվիրակության նախաձեռնությամբ: Իրաքի մարդու իրավունքների նախարար Մուհամմադ Շիա ալ-Սուդանին ջիհադիստներին մեղադրել է ցեղասպանության եւ հակամարդկային ոճիրների մեջ:

Խորհրդի անդամները սեպտեմբերի 1-ին լսել են «Իսլամական պետության» գրոհայինների ոճիրների վկայություններ. զանգվածային մահապատիժներ, բռնի իսլամացում, կանանց սեռական ստրկություն, ռազմական գործողությունների ընթացքում երեխաների օգտագործում:

Նիստը բացելովՙ ՄԱԿ-ի մարդու իրավունքների գծով գերագույն հանձնակատարի տեղակալ Ֆլավիա Պանսիերին նշել է, որ էթնիկական զտումների հետեւանքով առնվազն 1 մլն իրաքցի դարձել է փախստական: «Հիմնարար իրավունքներից բնակչության ամբողջ խմբերի զրկումը միջազգային իրավունքը որակում է իբրեւ մարդկայնության դեմ ուղղված հանցագործություն», ասել է նա: