ԱՌԱՋԻԿԱ ՎԵՑ ԱՄԻՍՆԵՐԻՆ ԳՅՈՒՄՐԻՈՒՄ ԲԳՎ-ՆԵՐ ԿՍՏԱՆԱ 215 ԸՆՏԱՆԻՔ ԱՐԱ ՄԱՐՏԻՐՈՍՅԱՆ Քաղաքում երկրաշարժի հետեւանքով անօթեւան ընտանիքների հարցը վերջնականապես կլուծվի 2015-ին Գյումրիում երկրաշարժի հետեւանքով դեռեւս անօթեւան մնացած մոտ 450 ընտանիքների բնակարանային խնդիրները կլուծվեն բնակարանի գնման վկայագրի (ԲՎԳ) տրամադրման միջոցով: Կառավարության որոշմամբ այդ նպատակով տրամադրվել է 1,5 մլրդ դրամ: Ինչպես մամուլի ասուլիսի ժամանակ տեղեկացրեց քաղաքաշինության նախարար Նարեկ Սարգսյանը, ծրագրի առաջին փուլում, առաջիկա վեց ամիսներին, վկայագիր կհանձնվի 215 ընտանիքի: Մյուս ընտանքիներին ԲԳՎ-ներ կհանձնվեն իրականացման երկրորդ փուլում` 2015-ին: Բնակարանների ձեռք բերման հենց այս տարբերակն են ընտրել աղետի հետեւանքով անօթեւան մնացած ընտանիքների մեծ մասը: Քաղաքաշինության նախարարը նշեց, որ այս տարբերակով այս ընտանքիների բնակարանային խնդրի լուծումը ավելի արագ կլինի եւ կնպաստի Գյումրիում անշարժ գույքի շուկայի կայացմանը: Նա նաեւ տեղեկացրեց, որ վկայագրեր տրամադրելուց հիմք է ընդունվել 1 քմ-ն 109 հազար դրամ շուկայական արժեքը: Բնակիչները նաեւ հնարավորություն կունենան ընտրություն կատարել ավելի թանկ կամ էժան բնակարաններ գնելու: Էժան գնելու դեպքում վկայագրում մնացած գումարը մնալու է բնակչին: Նարեկ Սարգսյանի հավաստմամբ, այսպիսով կավարտվի Գյումրիում երկրաշարժի հետեւանքով բնակարանային խնդիի լուծման հարցը: Նա հայտնեց, որ Գյումրիում բնակարանների ստացման հարցում շահառուներ են ճանաչվել 3240 ընտանիք, որից 2795-ի խնդիրը լուծվել էր մինչեւ 2012-13 թվականները: Ինչ վերաբերվում է ընդհանրապես աղետի գոտուն, ապա քաղաքաշինության նախարարի հավաստմամբ, դեռեւս բնակելիներ պետք է կառուցվեն Ախուրյանում եւ Լոռու մարզի գյուղական բնակավայրերում: Իրատեսական ծրագրով, դա հնարավորություն կտա մինչեւ 2016-ի վերջը ամբողջությամբ լուծել աղետի գոտու բնակարանային խնդիրը: | 
