ԱՋԱԿՑՈՒԹՅՈՒՆ «ԹԵՔԵՅԱՆ» ՎԱՐԺԱՐԱՆՆԵՐԻՆ «Թեքեյան Կենտրոն» հիմնադրամը շարունակում է աջակցություն ցուցաբերել հայ կրթօջախներին եւ իր մարդասիրական գործունեությամբ կապող օղակ հանդիսանալ Հայաստանի եւ Արցախի Թեքեյան դպրոցների միջեւ: Սեպտեմբերի 20-ին եւ 21-ին հիմնադրամն իրականացրեց իր հերթական միջդպրոցական ծրագիրը` երրորդ «Թեքեյանական խաղեր» մարզական միջոցառումը` նվիրված Հայաստանի անկախության 23-րդ տարեդարձին: Միջոցառման նպատակն էր ակտիվացնել դպրոցներում մարզական կյանքը եւ բարձրացնել սպորտի դերը, նպաստել երեխաների առողջության ամրապնդմանն ու առողջ ապրելակերպին, ինչպես նաեւ նպաստել տարբեր մարզերում գտնվող դպրոցների միջեւ սերտ համագործակցությանն ու համախմբմանը: «Թեքեյանական խաղեր - 2014» անցկացվեց Գյումրի քաղաքում` Վ. Թեքեյանի անվան թիվ 2 ավագ եւ Լորդ Բայրոնի անվան թիվ 20 հիմնական դպրոցներում: Մրցույթն ընդգրկում էր յոթ մարզաձեւ` շախմատ, ֆուտբոլ, բասկետբոլ, վոլեյբոլ, թենիս, վազք, հրում գետնից: Մասնակցում էր վեց թիմ` թվով 90 աշակերտ եւ մարզիչ, Հայաստանի (Երեւան, Գյումրի, Ստեփանավան, Կարբի) եւ Արցախի (Բերձոր)` Վ. Թեքեյանի անվան դպրոցներից, ինչպես նաեւ Գյումրիի Լորդ Բայրոնի անվան դպրոցից: Հիմնադրամը հնարավորություն էր ընձեռել աշակերտներին իրենց թիմային հաջող մասնակցությամբ մրցանակներ շահել եւ օգտակար լինել հարազատ դպրոցին: Բոլոր մասնակից-թիմերն էլ աչքի ընկան իրենց մարտական տրամադրությամբ, հաղթելու մեծ ցանկությամբ եւ ֆիզիկական պատրաստվածությամբ: Երկօրյա համառ պայքարից հետո մրցանակային տեղերը բաշխվեցին հետեւյալ կերպ` Կարբի - առաջին մրցանակ Երեւան - երկրորդ մրցանակ Ստեփանավան - երրորդ մրցանակ Բերձոր - խրախուսական մրցանակ Գյումրի «Թեքեյան» - խրախուսական մրցանակ Գյումրիի «Բայրոն» - խրախուսական մրցանակ «Թեքեյանական խաղեր - 2014» մրցանակաբաշխության արարողությունը տեղի ունեցավ Գյումրիի Վ. Թեքեյանի անվան դպրոցում, որն էլ պատրաստել էր նաեւ տոնական ձեռնարկ` դպրոցի ակրոբատների, երգիչների մասնակցությամբ: Հիմնադրամի տնօրեն Արմեն Ծուլիկյանը, պատվոգրերով եւ մրցանակներով պարգեւատրելով բոլոր մասնակից-թիմերին եւ նորանոր նվաճումներ ու հաջողություններ մաղթելով, ասաց. «Թեքեյանական խաղերում պարտվողներ չկան, քանզի մարզական այս ծրագիրը նպաստում է առողջ երիտասարդ սերնդի ձեւավորմանը, ընկերական շփմանն ու նոր կապերի հաստատմանը»: Տնօրենը նաեւ շնորհակալություն հայտնեց բոլոր դպրոցներին, մասնավորապես Գյումրիի Թեքեյան եւ Բայրոն դպրոցներին` ծրագրի իրականացմանը մեծապես աջակցելու համար: Միջոցառումը եզրափակվեց դպրոցների ներկայացուցիչների շնորհակալական խոսքով, ովքեր բարձր գնահատեցին «Թեքեյան կենտրոն» հիմնադրամի ջանքերը` սպորտի միջոցով կոփել ու կրթել դպրոցականներին: | 
