ՊՈՒՏԻՆԻ ԾՆՈՒՆԴԸ ՀՈՎԻԿ ԱՖՅԱՆ Հոկտեմբերի 8-ին նախագահ Սերժ Սարգսյանը շնորհավորել է իր ռուս գործընկեր Վլադիմիր Պուտինին` ծննդյան 63-ամյակի կապակցությամբ: Շնորհավորական ուղերձում Հայաստանի նախագահը մասնավորաբար ասել է. «Ձեր երկարամյա պետական գործունեությամբ, հարուստ քաղաքական փորձով եւ ի շահ Ռուսաստանի բարգավաճման եւ նրա քաղաքացիների բարեկեցության նախանշված նպատակներին հասնելու հետեւողականությամբ Դուք արժանացել եք Ձեր հայրենակիցների խորը հարգանքին եւ համաշխարհային ասպարեզում բարձր հեղինակության»: Սերժ Սարգսյանը նաեւ վստահություն է հայտնել, որ` «հայ-ռուսական ռազմավարական գործընկերության ամրապնդումը ինտեգրացիոն գործընթացների շրջանակներում եւ բազմակողմ կառույցների ձեւաչափով կնպաստի տարածաշրջանային կայունության եւ անվտանգության ապահովմանն ուղղված համատեղ նպատակներին»: Ի դեպ, նախագահներ Օբաման եւ Օլանդը, օրինակ, Պուտինին չեն շնորհավորել, ինչն անշուշտ այդպես է ոչ թե որովհետեւ ՌԴ նախագահը համաշխարհային ասպարեզում բարձր հեղինակություն չէ, այլ քանի որ ԱՄՆ-ի եւ Ֆրանսիայի քաղաքական մշակույթում չկա օտար պետությունների նախագահների ծնունդը շնորհավորելու արարողակարգ: Իմիջիայլոց, հենց հոկտեմբերի 8-ին Մոսկվայում տեղացել է առաջին ձյունը: Ինչպես «Տղամարդիկ» ֆիլմում է ասվում` օդերեւութաբանները դա հիմնավորեցին մթնոլորտային ինչ-ինչ ցիկլոններով, բայց մենք հո գիտե՞նք, թե ինչու հենց այդ օրը Մոսկվայում ձյուն տեղաց: | 
