ՄՈՒԳԱԲԵՆ, ԱԼԻԵՎԸ ԱՆԹԱԼԻԱՅԻ G-20-ԻՆ Ան. Հ. «Ֆրանկֆուրտեր ալգեմայնե ցայթունգի» առցանց տարբերակը նոյեմբերի 11-ին, հղում անելով գերմանական կառավարական աղբյուրներին իրազեկում է, որ Զիմբաբվեի պետության ղեկավար 91- ամյա Ռոբերտ Մուգաբեն, որ 2015- ի հունվարի վերջին ստանձնել է նաեւ Աֆրիկյան Միության նախագահի պաշտոնը, հրավիրվել է մասնակցելու թուրքական Անթալիայում կիրակի եւ երկուշաբթի գումարվելիք Մեծ 20- յակիՙ G- 20 գագաթաժողովին: Ընտրակեղծիքների, մարդու իրավունքների ծանրագույն խախտումների դիմաց 2002- ին ԵՄ պատժամիջոցներ էր կիրառել Զիմբաբվեի դեմ, այժմ հարաբերությունները թեեւ բնականոն են դարձել, սակայն Մուգաբեն եւ նրա կինը զրկված են ԵՄ մուտքի արտոնությունից: G- 20- ին Թուրքիան 6 հյուր երկրների թվում հրավիրել է նաեւ Ադրբեջանին: Անկարայի արտգործնախարարության ձեւակերպմամբՙ երկու երկրների հարաբերությունները բնորոշվում են որպեսՙ «մեկ ազգ, երկու պետություն», իսկ Էրդողանին եւ Ալիեւին միավորում է Հայաստանի հանդեպ հակառակորդ լինելը, նշում է «ՖԱՑ»-ը: |
