ԴՈՆԱԼԴ ԹՐԱՄՓԸ ԺԱՌԱՆԳՈՒՄ Է ԱՄԵՐԻԿԱՅԻ ԱՆՄԻԱՑՅԱԼ ՆԱՀԱՆԳՆԵՐԸ ՍԱՌԱ ԳԱՍՊԱՐՅԱՆ, Նյու Յորք Մ. Նահանգների 240 ամյա պետականության ընթացքում ընտրված 44 նախագահներից եւ ոչ մեկն այսպես սվինների վրա չի հարթել դեպի Սպիտակ տուն իր ուղին, ինչպես կատարվում է այսօր Դ. Փրամփի պարագայում: Նորընտիր նախագահի դեմ հեռացող ադմինիստրացիան հանդուգն ձեռնոց է նետել: Ձեւավորված մեդիա ընդդիմությունը, անտեսելով սուբորդինացիայի եւ բարոյականության բոլոր նորմերը, խարդավանքի եւ բանսարկության իր գզրոցից նրան առնչվող նոր «բացահայտումներ» է հրապարակում, որի ֆոնին շեքսպիրյան կրքերն ուղղակի խամրում են: Ամերիկան բաժանված է երկու հակադիր քաղաքական ճամբարների: Անհնազանդության զանգվածային ցույցեր են ծայր առել տասնյակ քաղաքներում, ինչն իր գագաթնակետին է հասնելու հունվարի 20-ինՙ ԱՄՆ 45-րդ նախագահի երդմնակալության օրը: Դրան հաջորդելու են Վաշինգտոնում հակա-թրամփական կանանց հարյուր հազարավոր բողոքի ակցիաները: Հրավիրված մեծաթիվ Կոնգրեսականներ (բոլորը դեմոկրատներ), հոլիվուդյան աստղեր, երգիչներ են բոյկոտելու Թրամփի պաշտոնակալման արարողությունը, որոնց թվում է ԱՄՆ քաղաքացիական իրավունքի պայքարի խորհրդանիշ, սեւամորթ կոնգրեսական (Ջորջիայի նահանգ)ՙ Ջոն Լյուիսը: Նա անվանում է Դ. Թրամփին անօրինական ճանապարհով ընտրված նախագահ, ով հաղթել է ընտրություններում ռուս համացանցահենների (հաքքերների) շնորհիվ: Ի դեպ, այս մասին խոսում են նույնիսկ մանկապարտեզի երեխաները, այնքան բարձրագոչ ու սկանդալային է հեռացող նախագահի եւ իր համախոհ օրենսդիրների կազմակերպած PR-ը Թրամփի հասցեին: Մեղադրանքն, ինչն աննախադեպ պետական հանցագործություն է ենթադրում, հիմնված է զուտ հետախուզության «ազնիվ խոսքի» վրա: ԱՄՆ ազգային հետախուզության գործակալության տնօրեն Ջեյմս Քլեյփըրը Կապիտոլիումում կայացած լսումների ժամանակ հայտնեց. «Մեր հետախուզությունն ունի անհերքելի փաստեր, որոնք վկայում են, որ ռուսները գողացել են ընտրությունների տվյալները»: Այսինքն, կոչ է արվում անվերապահորեն հավատալ ԱՄՆ հետախուզության տարածած կարծիքին: Սակայն մարդկանց հիշողությունը չէ՞ որ փորձ ունի: Նույն բնույթի սկանդալ նախորդեց Իրաքում ատոմային զենքի առկայության շուրջը, իսկ ներխուժումից հետո պարզվեց, որ սին էին այդ մեղադրանքները: Նույն բնույթի սկանդալ նախորդեց Սիրիայում քիմիական զենքի եւ Բաշար Ասադի անվան շուրջ, որի ծաղկուն երկիրը ավերվեց հովանավորված ընդդիմության եւ իսլամիստների միջոցով: Այս երկու ամիսների ընթացքում, թերեւս, հեշտությամբ կարելի էր ապացուցել Թրամփի դեմ ուղղված մեղադրանքների իսկությունը, իրեղեն ապացույցներ կանՙ քվեաթերթիկները: Սակայն այդ ճշմարտությունը, թվում է, որեւէ մեկին պետք չէ, կարեւորը հրապարակավ Թրամփի հաղթանակի վարկաբեկումն է, անձի նսեմացումը: Իր անվան շուրջ ձեւավորված այս թունավոր մթնոլորտը լրագրողների հետ ասուլիսի ժամանակ նա համեմատեց նացիստական Գերմանիայի հալածանքներին բնորոշ իրավիճակի հետ: Ակնհայտ է, որ տասնամյակներ ձեւավորված ամերիկյան «Իստաբլիշմենտը» գոյապահպանման ջղաձգումների մեջ է եւ հեշտությամբ չի զիջելու դիրքերը իր չափանիշերին չհամապատասխանող այլախոհ բիզնեսմենին: ԱՄՆ ամենատարեց նախագահիՙ 70 ամյա Թրամփի նկատմամբ այսօր ահռելի ճնշում է գործադրվում, եւ հսկայական համբերություն, կամք, նաեւՙ առողջություն կպահանջվի որպեսզի կանխվի «արաբական գարնան» սցենարի հնարավոր «ամերիկյան» տարբերակը: Նա արդեն իսկ ետ քայլ է կատարել իր նախընտրական որոշ խոստումներից: Եթե հաջողվի, մտադիր է նախագահել երկու շրջան, այդ ընթացքում ստանալով մեկ դոլար խորհրդանշական աշխատավարձ: Վաշինգտոնում այսօր, հունվարի 20-ին, տեղի է ունենում ԱՄՆ նախագահ Դոնալդ Թրամփի երդմնակալության արարողությունը: Ձեռքին լինելու է երկու Աստվածաշունչՙ մեկն իր մոր նվիրածը, մյուսնՙ այն Սուրբ Գիրքը, որի վրա երդվել են ԱՄՆ երկու նախագահներ միայնՙ Աբրահամ Լինքըլն ու Օբաման: Սկսվելու է Թրամփի կառուցելիք «Գրեյթ Ամերիկայի» ժամանակաշրջանը: Ի՞նչ կտա այն մեզՙ հայերիս, դժվար է ասել, առջեւում դեռ տագնապալի անորոշություն է խնդրահարույց շատ հարցերի շուրջ: Իսկ կհաջողվի՞ արդյոք առաջիկա չորս տարիների ընթացքում Թրամփի կարգախոսը տեղայնացնել հայոց կյանքի եւ իրողության մեջ, փոխելով միայն երկրի անունըՙ «Make Armenia Great Again»: Այս հարցին, թերեւս, հայ ժողովուրդը կպատասխանի սպասվելիք խորհրդարանական եւ նախագահական ընտրություններում: |
